Durant in'acziun da notg per regular ils lufs ha in guardiaselvaschina sajettà dus lufs-tscherver giuvens ed in luf-tscherver creschì. Suenter ch'el aveva constatà il sbagl, ha il guardiaselvaschina annunzià il cas immediatamain als posts superiurs. Sin quai han ins instradà ina inquisiziun penala è prendì emprimas mesiras.
Ils 16 da november 2024 ha in guardiaselvaschina sajettà per sbagl trais lufs-tscherver durant in'acziun da notg per regular ils lufs. Capità è quai, cura ch'il guardiaselvaschina – che ha ses circul da surveglianza ordaifer il perimeter da prelevaziun – era en gir en Surselva per incumbensa da l'Uffizi da chatscha e pestga (UCP) sin ina missiun per regular ils lufs. El era a la tschertga dals trais luffins restants – da tut en tut otg – dal triep dal Vorab, ch'eran vegnids dads liber il cumenzament da settember per la regulaziun. Ils trais animals scuvrids eran vegnids identifitgads durant la notg cun agid da la tecnica da maletgs termics. Il guardiaselvaschina è stà fermamain persvadì, ch'el tiria sin ils trais lufs giuvens menziunads, che sa chattavan en quest territori. Immediatamain suenter avair chattà ils lufs-tscherver ch'el aveva sajettà per sbagl, ha il guardiaselvaschina annunzià quai a ses superiurs. I sa tracta da dus lufs-tscherver giuvens da quest onn e d'in luf-tscherver mastgel creschì.
Il guardiaselvaschina ha denunzià sasez a la Procura publica dal chantun Grischun. Las raschuns, pertge ch'el ha sajettà quests animals per sbagl, vegnan examinadas en il rom da l'inquisiziun penala. Eventualas consequenzas penalas vegn decididas da la Procura publica. «Nus deplorain zunt fitg quest cas e vegnin ad examinar quel en detagl», di Adrian Arquint, manader da l'Uffizi da chatscha e pestga. L'uffizi saja conscient dal fatg, ch'insatge uschia na dastgia betg capitar. Il UCP ha exclus il guardiaselvaschina per immediat da la regulaziun dals lufs, fin ch'il cas è sclerì cumplettamain.
Recolonisaziun unica vegn examinada
Il luf-tscherver eurasian è protegì tras il dretg federal e vala sco spezia da fitg auta prioritad naziunala. En il chantun Grischun han ins pudì confermar la stad 2024 almain set reproducziuns. Singulas perditas pon dentant donnegiar la structura da la populaziun dals lufs-tscherver. Perquai examinescha il chantun ussa ensemen cun l'Uffizi federal d'ambient (UFAM), sch'il donn chaschunà vi da la populaziun dals lufs-tscherver duai vegnir cumpensà tras l'apport unic d'in dumber cumparegliabel da lufs-tscherver or d'ina populaziun estra.
Infurmaziuns:
Adrian Arquint, manader da l'Uffizi da chatscha e pestga dal Grischun, tel +41 81 257 38 91 (cuntanschibel da las 08.30 fin las 10.00), e‑mail Adrian.Arquint@ajf.gr.ch
Responsabladad: Uffizi da chatscha e pestga