L'Archiv dal stadi dal Grischun sa legra da preschentar la publicaziun la pli nova en sia retscha «Funtaunas e perscrutaziuns davart l'istorgia dal Grischun» (FIG). Tar l'istorgia culturala ed economica dal chantun tutga er l'istorgia da la viticultura grischuna. En il pli nov tom vegn quella illuminada davent dal temp medieval tempriv fin al cumenzament dal 20avel tschientaner.
Il cudesch rapporta dal vin da l'uvestg e d'anteriuras claustras, da torchels, da podestats e da persunas feudalas. Durant il temp modern tempriv eran las vignas grischunas da la Val dal Rain da Cuira fin en la Valtellina ina resursa economica impurtanta er per patruns da bains profans ed ina part da la cultura da represchentanza. Vers la fin dal 18avel tschientaner è sa sviluppada ina classa mesauna purila da viticulturs ch'è s'occupada intensivamain da dumondas praticas.
Sin basa da diaris e da brevs vegnan ils pass da lavur durant l'onn da viticultura tradiziunal reconstruids en moda exacta e detagliada. Il cudesch porscha ina invista dal mintgadi dals maister viticulturs, da las schurnalieras e dals schurnaliers en ina da las branschas agriculas las pli intensivas.
El sa basa sin in project da perscrutaziun ch'è vegnì realisà tar il Institut per la perscrutaziun da la cultura grischuna icg. Il icg è co-editur dal tom.
Fotografia:
Panorama dal Signuradi, enturn 1750. Maletg d'in artist nunenconuschent en il chastè Bothmar, Malans. Ins vesa bain las numerusas vignas.
Agiunta:
Infurmaziuns detagliadas davart il cudesch
Exemplars da recensiun pon vegnir dumandads sut florian.hitz@sag.gr.ch.
Vernissascha:
Glindesdi, ils 16 da december 2024, a las 18.30, Museum da viticultura Torculum, Cuira
L'occurrenza è publica, suenter la preschentaziun dal cudesch datti in apero.
Infurmaziuns:
Responsabladad: Uffizi da cultura / Archiv dal stadi