Sin invitaziun da la Regenza grischuna ha la Regenza dal chantun Neuchâtel visità ier ed oz il chantun Grischun.
Al timun da la visita da la delegaziun da Neuchâtel en il chantun Grischun è stada la presidenta da la Regenza Florence Nater. Ella è vegnida accumpagnada da la cussegliera guvernativa Crystel Graf e dals cussegliers guvernativs Laurent Favre, Alain Ribaux, Frédéric Mairy sco er da la chanceliera Séverine Despland. Las commembras ed ils commembers da la Regenza da Neuchâtel èn vegnids beneventads cordialmain er en preschientscha d'intginas partenarias.
Suenter ina curta preschentaziun da l'Archiv dal stadi dal Grischun a Cuira èn las duas delegaziuns viagiadas ier vinavant a Domat. Là han ellas visità l'interpresa grischuna da hightec Hamilton Medical. Suenter ha il viadi cuntinuà vinavant cun bus a Tumegl, nua ch'ils giasts han la finala pernottà.
Oz avantmezdi ha il gir cuntinuà a Cuira, cun ina visita en il Museum d'art dal Grischun. Las duas delegaziuns èn silsuenter viagiadas cun bus en il Signuradi, ad in referat da prof. dr. Rico Franc Valär en il bain da viticultura Davaz a Fläsch davart l'impurtanza dal rumantsch e dal talian en il chantun Grischun. Avant ch'ils giasts èn returnads a Neuchâtel, èn els sa fermads – per finir la visita – a Maiavilla per in gentar cuminaivel.
La visita da la Regenza dal chantun Neuchâtel ha servì en emprima lingia a tgirar las relaziuns amicablas ed a barattar experientschas sin ils champs da la cultura, da l'economia e da la politica.
Fotografias agiuntadas:
Las delegaziuns dal Grischun e da Neuchâtel sin il bain da viticultura Davaz a Fläsch
Il president da la Regenza grischuna Jon Domenic Parolini cun la presidenta da la Regenza da Neuchâtel Florence Nater
Infurmaziuns:
President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, e‑mail Jondomenic.Parolini@ekud.gr.ch
Responsabladad: Regenza