La Regenza grischuna ha elegì Heinz Huber sco nov president da la Banca Chantunala Grischuna. Heinz Huber entra en uffizi il 1. da fanadur 2025. El suonda a Peter A. Fanconi.

Tenor la Lescha davart la Banca Chantunala Grischuna (BCG) è la Regenza cumpetenta per eleger il cussegl da banca che sa cumpona da set persunas. Sco nov president per la perioda d'uffizi dal 1. da fanadur 2025 fin ils 30 da zercladur 2029 ha ella elegì Heinz Huber.

Heinz Huber è vegnì elegì sin fundament da sia experientscha da blers onns e cumprovada en la branscha da finanzas. Dapi l'onn 2019 presidiescha Heinz Huber il gremi directiv da Raiffeisen Svizra, ch'è responsabel per la direcziun strategica e la surveglianza da la gruppa Raiffeisen – la segund gronda gruppa da bancas da la Svizra. Avant è el stà blers onns parsura e commember da la direcziun da la Banca Chantunala da Turgovia. Cun in emprendissadi da banca tar la UBS ha Heinz Huber emprendì da fund ensi tut las fatschentas da banca. El dispona d'in master of business administration (MBA) da l'Universitad da Rochester e da l'Universitad da Berna ed ha fatg differentas furmaziuns supplementaras a la Harvard Business School ed a l'Universitad da Son Gagl. Heinz Huber ha 60 onns ed è collià cun il Grischun en spezial tras ses segund domicil.

Il cussegl da banca sto vegnir renovà cuntinuadamain. Questa renovaziun ha lieu cun resguardar las prescripziuns da l'Autoritad federala per la surveglianza dals martgads da finanzas (FINMA), las prescripziuns chantunalas da corporate governance sco er il profil d'exigenzas da la Regenza envers il presidi da la banca.

Il president actual da la banca Peter A. Fanconi ha communitgà il fanadur 2024 sia demissiun. Per garantir ina midada fluctuanta dal presidi, resta Peter A. Fanconi anc fin la fin da zercladur 2025 en sia funcziun sco president da la banca. La Regenza engrazia gia ussa ad el per sia activitad preziusa e prosperaivla durant blers onns sco president dal cussegl da banca da la Banca Chantunala Grischuna.

Fotografia agiuntada:

Heinz Huber, il nov president da la Banca Chantunala Grischuna 
Foto: Raiffeisen Schweiz

Agiunta:

Curs da la vita

Infurmaziuns:

Cusseglier guvernativ Martin Bühler, schef dal Departament da finanzas e vischnancas, tel +41 81 257 32 05 (cuntanschibel da las 09.00 fin las 10.00), e‑mail Martin.Buehler@dfg.gr.ch

Responsabladad: Regenza

Ad hoc-Mitteilung gemäss Art. 53 KR