La Regenza grischuna ha avert la consultaziun tar il relasch d'ina Lescha davart la furmaziun professiunala superiura (LFPS). La finamira da questa lescha è quella, da rinforzar sistematicamain la furmaziun professiunala superiura e da l'adattar a las cundiziuns generalas actualas. Quest pass suttastritga l'impurtanza da la furmaziun professiunala superiura sin il stgalim terziar per il Grischun sco lieu economic.

En il rom da la revisiun parziala da la Lescha davart las scolas autas e la perscrutaziun ha la Regenza grischuna exprimì sia intenziun, da promover e da rinforzar sistematicamain il sectur terziar da la furmaziun professiunala superiura ch'è er impurtant per il chantun Grischun. Per cuntanscher quai, èsi da procurar per la libertad d'agir giuridica e materiala respectiva. Particularmain en vista a las cundiziuns spezialas localas, economicas e demograficas dal chantun Grischun duain ils dus secturs «furmaziun professiunala superiura» e «scolas autas» dal stgalim terziar vegnir reglads en atgnas leschas. Qua tras duai vegnir exprimida la gronda impurtanza economica e sociala da la furmaziun professiunala superiura per noss chantun. Plinavant è quest pass da chapir sco reacziun sin la mancanza da persunas spezialisadas ch'exista actualmain en differentas branschas.

Il sboz da lescha stgaffescha las cundiziuns generalas, per che las instituziuns da la furmaziun professiunala superiura possian concepir en cooperaziun cun l'economia regiunala purschidas da furmaziun flexiblas ed orientadas al futur. Ultra da quai duain vegnir stgaffidas las premissas per la finanziaziun e per il svilup da novs purschiders da furmaziun. Per promover la furmaziun professiunala superiura sco agen champ da furmaziun dal sectur terziar, prevesa la lescha ina clera differenziaziun da la furmaziun professiunala da basa.

Ils documents da consultaziun èn ussa disponibels
La consultaziun dura dals 19 da december 2024 fin ils 19 da mars 2025. Ils documents appartegnents pon vegnir consultads sin la pagina d'internet dal chantun Grischun. Plinavant pon els er vegnir empustads tar il Departament d'educaziun, cultura e protecziun da l'ambient per telefon (+41 81 257 27 02) u per e-mail (info@ekud.gr.ch).

Infurmaziuns:

• President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient. Las dumondas vegnan coordinadas dad Yvonne Brigger, responsabla per la communicaziun dal Departament d'educaziun, cultura e protecziun da l'ambient, tel. +41 81 257 44 66 (cuntanschibla da las 13.00 fin las 14.00), e‑mail Yvonne.Brigger@ekud.gr.ch
• Dr. Gion Lechmann, manader da l'Uffizi per la furmaziun media-superiura, e‑mail Gion.Lechmann@ahb.gr.ch