Las chatschadras ed ils chatschaders grischuns han sajettà durant l'onn ch'è gist passà 4877 tschiervs, 2619 chavriels, 2928 chamutschs e 72 portgs selvadis en il chantun. Ultra d'exequir lur passiun han las chatschadras ed ils chatschaders ademplì ina incumbensa impurtanta a favur dal bainstar communabel. La regulaziun da las populaziuns da selvaschina d'ungla presta ina contribuziun impurtanta per in guaud da protecziun saun.

Grazia a las bunas cundiziuns da chatscha ed al grond engaschament da las chatschadras e dals chatschaders grischuns è il dumber da tschiervs sajettads stà bun en la chatscha auta l'onn 2024. Cun 1955 tschiervs e cun 148 chavriels è il plan da la chatscha speziala stà l'onn 2024 pli bass ch'en ils onns precedents. La chatscha da selvaschina d'ungla è ida a fin ils 18 da december 2024 cun l'ultim di da la chatscha speziala.

Buna lavur malgrà cundiziuns difficilas
Vers la fin da november ha il cumenzament da l'enviern procurà per naiv fin giu en la val. Pervia da las pitschnas quantitads da naiv èn ils tschiervs dentant restads ditg en ils quartiers da stad. Fin il december han ils animals tardivà da sa render en ils funs da las vals, nua ch'igl era pussaivel bain d'ir a chatscha. Concentraziuns pli grondas da tschiervs en quartiers d'enviern optimals n'hai betg dà. Quai ha difficultà en blers lieus d'ademplir ils plans da prelevaziun.

«Las chatschadras ed ils chatschaders han prestà ina fitg buna lavur malgrà cundiziuns difficilas ed èn ids a la chatscha speziala en la gronda part da las regiuns durant 10 dis da chatscha», di Lukas Walser, manader da la partiziun Selvaschina e chatscha tar l'Uffizi da chatscha e pestga. Tar ils tschiervs è la preda da la chatscha speziala cun 1200 animals quasi tuttina gronda sco l'onn precedent 2023. Tut en tut han las chatschadras ed ils chatschaders sajettà durant la chatscha speziala 91 chavriels, 1 chamutsch e 7 portgs selvadis.

Cun in resultat total da 4877 tschiervs e 2619 chavriels èn ils plans da prelevaziun da tschiervs vegnids ademplids per 98 pertschient e quels da chavriels per 97 pertschient. Tar il tschierv è la cifra da prelevaziun dals animals feminins decisiva per la regulaziun. Cun 2280 animals feminins è il plan qualitativ vegnì ademplì per stgars 80 pertschient. En territoris, nua ch'i era necessari e raschunaivel, ha la surveglianza da chatscha anc sajettà singuls animals.

La reducziun da la populaziun da tschiervs è pretensiusa
Perquai che la populaziun da tschiervs era memia gronda en bleras regiuns dal chantun, èn vegnidas definidas populaziuns regiunalas ch'ins vul cuntanscher sin basa da la strategia da la Regenza «Spazi da viver guaud-selvaschina 2021». La primavaira 2024 importava la populaziun chantunala 14 225 tschiervs. Quai correspunda ad ina reducziun da passa 2000 animals dapi l'onn 2020. En tschertas regiuns era gia cuntanschida la populaziun ch'ins vuleva avair, e l'incumbensa da la chatscha è stada quella da stabilisar questa populaziun. En differentas autras regiuns sco il Partenz, la Val dal Rain Grischuna u la regiun Term Bel ha l'effectiv da tschiervs dentant stuì vegnir reducì anc ulteriuramain. Cun gronds sforzs han las chatschadras ed ils chatschaders empruvà l'onn 2024 d'ademplir il plan da prelevaziun pretensius. Cun 4877 tschiervs è vegnida prelevada ina quota da 34 pertschient da la populaziun da primavaira 2024. «Quai è in fitg bun resultat final», di Lukas Walser. Sch'ils svilups dals trieps da lufs, ch'èn vegnids prendids en mira cun la chatscha 2024, han pudì vegnir cuntanschids en tut las regiuns, vegnan las dumbraziuns dals trieps a mussar la proxima primavaira.

Infurmaziuns:

Lukas Walser, manader da la partiziun Selvaschina e chatscha, Uffizi da chatscha e pestga, tel. +41 81 257 21 58 (cuntanschibel da las 10.00 fin las 12.00), e‑mail Lukas.Walser@ajf.gr.ch

Responsabladad: Uffizi da chatscha e pestga