La tempra grischuna a la testa da la pli gronda ed unica interpresa d'energia grischuna, ch'è integrada verticalmain, duai vegnir rinforzada. Ils trais acziunaris principals da la Repower – Ovras electricas dal chantun Turitg, chantun Grischun, CEIS 3/UBS-CEIS 2 – han perquai concludì cuminaivlamain da francar la Repower SA anc pli ferm en il Grischun e d'occupar il presidi dal cussegl d'administraziun da nov tenor las directivas per il process da recrutaziun dal chantun Grischun. Pervia da questa nova orientaziun n'èsi betg pussaivel da nominar anc ina giada dr. Monika Krüsi, che ha presidià ils ultims 7 onns il cussegl d'administraziun da la Repower SA, per l'elecziun a la radunanza generala 2025.

Dapi l'onn 2018 è dr. Monika Krüsi en funcziun sco presidenta independenta dal cussegl d'administraziun da la Repower SA. Durant onns turbulents sin ils martgads d'energia è la Repower – cun ella sco presidenta dal cussegl d'administraziun – sa cumprovada sco interpresa robusta. La Repower ha gì bler success ed ha fatg in grond progress. Ella ha meglierà decisivamain ses process, è daventada pli transparenta e dinamica ed ha cuntanschì resultats excellents. L'engaschament en la producziun d'electricitad ord energias regenerablas ed en il commerzi d'energia è vegnì promovì consequentamain. Ultra da quai ha ella investì considerablamain en la renovaziun dals implants idraulics existents, ma er en l'engrondiment dals implants solars e d'energia da vent en Svizra ed en l'Italia. Il cussegl d'administraziun ed ils acziunaris principals engrazian explicitamain a dr. Monika Krüsi per ses engaschament per la Repower SA

Il mandat vegn publitgà tenor las directivas per il process da recrutaziun dal chantun Grischun ed observa uschia las prescripziuns chantunalas da corporate governance. Il termin d'annunzia dura fin ils 31 da schaner 2025. L'elecziun ha lieu a chaschun da la radunanza generala da la Repower SA dals 14 da matg 2025.

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 12.00 fin las 13.00), e‑mail Carmelia.Maissen@diem.gr.ch
• Thomas Grond, manader Communicaziun da la Repower, tel. +41 81 423 78 75, e‑mail thomas.grond@repower.com

Responsabladad: Departament d'infrastructura, energia e mobilitad