La taglia da traffic en il chantun Grischun duai vegnir calculada en l'avegnir tenor mesiras che correspundan al stadi actual da la tecnica da vehichels. Las taglias da traffic per autos da persunas duain da nov vegnir calculadas sin basa dal pais e da la prestaziun da norma empè da la cilindrada. Vehichels spezialmain effizients areguard l'energia duain profitar da rabats da durada limitada. La revisiun da la lescha ch'è necessaria per questas midadas ha la Regenza deliberà per la consultaziun.
Las possessuras ed ils possessurs ston pajar ina taglia da traffic per vehichels a motor e per chars annexs ch'èn immatriculads en il chantun Grischun. Actualmain sa basa la taglia da traffic per vehichels cun in motor termic sin la cilindrada. Pervia dal progress tecnologic sa reducescha la cilindrada cuntinuadamain. Ultra da quai s'augmenta il dumber da vehichels cun motors alternativs, che profiteschan d'ina reducziun da la taglia da durada illimitada da fin 80 pertschient. Pervia da quests svilups sa reduceschan er cuntinuadamain las entradas da la taglia da traffic che servan al chantun per finanziar il quint da las vias.
Per pudair generar vinavant entradas en la dimensiun actuala, sto la taglia da traffic perquai vegnir concepida da nov. En quest connex ston vegnir resguardads il «Plan d'acziun Green Deal per il Grischun (AGD)» sco er l'incumbensa Hohl concernent la midada e la garanzia da la persistenza da la taglia sin il traffic stradal.
La taglia da traffic duai vegnir concepida uschia, ch'ella è ecologica, ch'ella è neutrala areguard las tecnologias ed areguard il retgav, ch'ella po vegnir exequida e ch'ella porta in retgav stabil. Partind da questas finamiras èn vegnids examinads numerus models. La Regenza ha considerà ils avantatgs ed ils dischavantatgs dals differents models ed è vegnida a la conclusiun, che la taglia da traffic per autos da persunas duai en l'avegnir vegnir calculada da princip sin basa dal «pais total» e da la «prestaziun da norma».
Rabats da durada limitada per vehichels effizients areguard l'energia
Las persunas che possedan in vehichel spezialmain effizient areguard l'energia, duain profitar da rabats da durada limitada. Per las ulteriuras categorias da vehichels duain valair vinavant sistems da calculaziun spezials. A partir dal mument che la taglia entra en vigur, duain las novas taglias da traffic valair per tut ils vehichels, quai senza fasa transitorica.
Ils documents da consultaziun èn ussa disponibels
La consultaziun dura dals 3 da favrer 2025 fin ils 30 d'avrigl 2025. Ils documents correspundents pon vegnir consultads sin la pagina d'internet dal chantun Grischun. Ultra da quai pon els vegnir empustads per telefon (tel. +41 81 257 25 13) tar il Departament da giustia, segirezza e sanadad.
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 13.00 fin las 14.00), e‑mail Peter.Peyer@djsg.gr.ch
Responsabladad: Regenza