Dals 17 fin ils 23 da mars 2025 ha lieu per l'emprima giada l'Emna d'acziun chantunala cunter il rassissem en il Grischun. Ensemen cun differentas organisaziuns, instituziuns e gruppas engaschadas metta il chantun uschia in signal cunter la discriminaziun e per ina societad averta ed inclusiva.
Durant l'Emna d'acziun cunter il rassissem en il Grischun envidan tut en tut 22 occurrenzas da s'occupar criticamain dal rassissem e da dar impuls per ina convivenza cun respect. Discussiuns al podium, lavuratoris, preschentaziuns da films e da teaters sco er formats interactivs porschan l'occasiun da reflectar e d'entrar en il dialog. Projects da scola e lavuratoris per giuvenils creeschan spazis per elavurar pussaivladads d'agir cunter discriminaziun.
Il Post spezialisà per l'integraziun da l'Uffizi da migraziun e da dretg civil sco er il Post da cussegliaziun cunter rassissem dal Grischun avran l'emna d'acziun glindesdi, ils 17 da mars en il Marsöl a Cuira, ensemen cun il cusseglier guvernativ Peter Peyer, schef dal Departament da giustia, segirezza e sanadad. Suenter spetga in program varià cun referats e cun preschentaziuns artisticas che intimescha las participantas ed ils participants da reflectar davart agens pregiudizis.
Render visibla la discriminaziun
In dals puncts culminants spezials da l'emna è l'uschenumnada Living Library en la Biblioteca da la citad da Cuira, nua che persunas ch'èn stadas confruntadas cun discriminaziun raquintan da lur destin. In auter punct culminant è il lavuratori da podcast da JazzCuira, che s'occupa da la lingua senza discriminaziuns. Ultra da quai metta in brunch cultural en il Kulturpunkt a Cuira in accent culinaric per la diversitad.
L'emna d'acziun envida da cooperar activamain. «Cun questa emna na vulain nus betg mo far attent al rassissem, mabain encuraschar umans da s'engaschar a lunga vista per ina societad averta e solidarica», di Felix Birchler, l'incumbensà d'integraziun dal chantun Grischun. La discriminaziun pervia da l'origin, da la colur da la pel, da la religiun u da la lingua violescha ils dretgs umans – da s'engaschar cunter quai è ina incumbensa centrala dal Post spezialisà per l'integraziun dal Grischun e dal Post da cussegliaziun cunter rassissem.
Avertura da l'emna d'acziun: Glindesdi, ils 17 da mars 2025, a las 18.00 en il Marsöl a Cuira en preschientscha dal cusseglier guvernativ Peter Peyer, schef dal Departament da giustia, segirezza e sanadad.
Il program detaglià chattais Vus sut www.rassismusberatung.gr.ch
Infurmaziuns:
Felix Birchler, manader dal Post spezialisà per l'integraziun / incumbensà chantunal d'integraziun, Uffizi da migraziun e da dretg civil, tel +41 81 257 36 84 (cuntanschibel da las 8.00 fin las 12.00), e‑mail Felix.Birchler@afm.gr.ch
Responsabladad: Uffizi da migraziun e da dretg civil