Sin invit da la Regenza ha Petros Mavromichalis, l'ambassadur da l'Uniun europeica per la Svizra e per il Principadi da Liechtenstein, visità oz il chantun Grischun.

L'ambassadur da la UE Petros Mavromichalis è vegnì beneventà oz en la Chasa grischa a Cuira dal president da la Regenza Marcus Caduff, dal chancelier Daniel Spadin e da l'incumbensà per relaziuns externas dal chantun Grischun Dominik Hemmi. Vegnì accumpagnà è l'ambassadur da Samuel Fernández, policy officer da la delegaziun da la UE. Suenter il barat dals salids uffizials è in gentar cuminaivel stà sin il program.

La Regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan discutadas savens dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada:

Da sanestra: Dominik Hemmi, chancelier Daniel Spadin, ambassadur Petros Mavromichalis, president da la Regenza Marcus Caduff e Samuel Fernández