Sin invit da la Regenza visita la presidenta dal Cussegl naziunal Maja Riniker oz e damaun il chantun Grischun. La delegaziun sa scuntra a Cuira e viagia silsuenter cuminaivlamain en l'Engiadin'Ota a Samedan. En il center da la visita da dus dis stat la participaziun al Chalandamarz. Quest usit exprima en moda impressiunanta la diversitad culturala e tradiziunala da la regiun.

Oz viagia la pli auta Svizra, la presidenta dal Cussegl naziunal Maja Riniker, cun la Viafier retica da Cuira en l'Engiadin'Ota. Sin invit da la Regenza vegn ella accumpagnada da cussegliers dals chantuns, da cusseglieras naziunalas e cussegliers naziunals dal Grischun sco er da commembras e commembers dal Cussegl grond da l'Engiadin'Ota. Suenter l'arrivada a Samedan maina l'emprim punct dal program la delegaziun a Punt Muragl. Davent da là vai cun la pendiculara si Muottas Muragl, nua che las participantas ed ils participants vegnan a giudair en il restaurant panoramic ina tschaina cun vista sin il panorama da las muntognas engiadinaisas.

Cultura e tradiziun en il center
Il di da damaun stat dal tuttafatg sut l'ensaina dal Chalandamarz. Sin la plazza communala da Samedan vegn la delegaziun a persequitar l'usit multifar. La presidenta dal Cussegl naziunal transmetta in salid a la populaziun preschenta da la vischnanca. Grazia a quest barat daventa l'avantmezdi in punct culminant spezial. Suenter in gentar cuminaivel di la delegaziun adia e sa metta sin via a chasa.

Fotografia agiuntada:

Maletgs stattan a disposiziun il 1. da mars 2025 a partir da las 17.30 sut il suandant link: pCloud-Link

Infurmaziuns:

Cusseglier guvernativ Martin Bühler, schef dal Departament da finanzas e vischnancas

Las dumondas vegnan coordinadas da Dominik Hemmi, incumbensà per relaziuns externas, tel. +41 81 257 22 39, e‑mail Dominik.Hemmi@staka.gr.ch

Responsabladad: Regenza