La Cuminanza da lavur da las regiuns alpinas (ARGE ALP) tschertga en il rom d'ina concurrenza projects che promovan il pensar d'interprendider da persunas giuvnas en territoris periferics. Annunzias pon vegnir inoltradas fin ils 26 da matg 2025. Tut en tut vegn surdada ina summa da 10 000 euros.

L'onn 2025 presidiescha la provinza autonoma da Trento la ARGE ALP. Sut il tema «La generaziun giuvna da muntogna: viver, lavurar e gudagnar en las Alps» vul ella metter en il center ils lieus ch'èn impurtants per il mintgadi da las persunas che vivan qua. Gist en territoris che sa depopuleschan adina pli fitg, dovri projects che dattan respostas ed ina perspectiva da lavur a persunas giuvnas che vulan viver vinavant en las muntognas. En il center stattan projects innovativs ed originals che pon vegnir realisads er en autras regiuns da muntogna. Il premi ARGE ALP 2025 undrescha iniziativas extraordinarias che collian persunas giuvnas pli fitg cun il territori alpin.

Interpresas, start-ups e scolas pon inoltrar projects
Il premi ARGE ALP 2025 sa drizza ad interpresas ed ad instituziuns en regiuns predominantamain ruralas che promovan in pensar d'interprendider da persunas giuvnas en territoris perifers:

• Interpresas e start-ups che sviluppan projects creativs ed innovativs – en spezial per persunas giuvnas – en connex cun l'utilisaziun da materias primas natiralas localas;
• Scolas cun scolaras e scolars a partir da 14 onns èn pledentadas, sch'ellas realiseschan projects da recicladi e d'upcycling che rinforzan l'economia circulara e reutiliseschan raschunaivlamain materias primas natiralas.

Ils projects inoltrads ston gia esser en la fasa da realisaziun, na dastgan dentant betg anc esser terminads.

Surdada dal premi a chaschun da la Conferenza da las scheffas e dals schefs da las regenzas da la ARGE ALP
La selecziun dals projects victurs vegn fatga en ina procedura da dus stgalims. Ina giuria regiunala elegia ils megliers projects dal chantun Grischun. En in ulteriur pass eruescha la giuria internaziunala las victuras ed ils victurs finals. Ellas ed els vegnan envidads l'october 2025 a Trento a la surdada dal premi che ha lieu en il rom da la Conferenza da las scheffas e dals schefs da las regenzas da la ARGE ALP. Tut en tut vegn surdada ina summa da 10 000 euros.

Inoltraziuns grischunas
Ils projects dal chantun Grischun pon vegnir tramess fin ils 26 da matg 2025 a l'adressa dad e-mail Tamara.Freuler@staka.gr.ch. I vegnan resguardads mo projects che adempleschan las modalitads per l'annunzia e che vegnan inoltrads cun ils documents da publicaziun cumplets.

Las directivas, il formular da participaziun, il consentiment per l'elavuraziun da datas sco er ulteriuras infurmaziuns chattais Vus sut www.argealp.org.

Commembers da la ARGE ALP èn il stadi liber Baviera da la Germania, ils stadis federativs Tirol, Salzburg e Vorarlberg da l'Austria, las provinzas autonomas Bulsaun-Tirol dal Sid e Trento sco er la regiun Lumbardia da l'Italia ed ils chantuns Grischun, Son Gagl e Tessin da la Svizra.

Infurmaziuns:

Tamara Freuler, responsabla per la communicaziun, Chanzlia chantunala dal Grischun, tel. +41 81 257 22 28,  e‑mail Tamara.Freuler@staka.gr.ch