Al Meiersboda a l'ur da la citad da Cuira cumenzan oz mesemna, ils 5 da mars 2025, las lavurs da construcziun per il nov center d'instrucziun da la protecziun civila. La realisaziun da l'edifizi nov sin il territori communal da Churwalden vegn a durar circa 2 onns. Cun il nov edifizi survegnan la protecziun civila e sias organisaziuns partenarias in lieu da scolaziun modern.

Il nov edifizi a l'ur da la citad da Cuira remplazza l'edifizi da scolaziun existent, ch'è var 50 onns vegl, e daventa ina part da l'infrastructura da protecziun civila gia existenta al Meiersboda. «Il nov center d'instrucziun da la protecziun civila na vegn betg mo a persvader las utilisadras ed ils utilisaders cun sia auta funcziunalitad e flexibilitad, mabain er perquai ch'i vegnan utilisads materials che schanegian l'ambient», ha ditg la cussegliera guvernativa Carmelia Maissen, scheffa dal Departament d'infrastructura, energia e mobilitad, a chaschun da l'emprima badigliada al lieu.

Investiziun per la segirezza dal chantun
Las sfidas da dar dumogn ad eveniments multipels e cumplexs èn gia oz grondas per la protecziun civila e per organisaziuns partenarias da la protecziun da la populaziun (polizia, pumpiers, sectur da sanadad e manaschis tecnics). Per garantir la prontezza a l'acziun, dovri per la scolaziun e per l'engaschament en cas d'in eveniment ina infrastructura moderna che correspunda als basegns. «Grazia al nov edifizi vegn la qualitad da la scolaziun da la protecziun civila meglierada e la collavuraziun cun las organisaziuns partenarias rinforzada», ha cuntinuà la cussegliera guvernativa Carmelia Maissen. «Il center d'instrucziun da la protecziun civila è ina investiziun impurtanta per la segirezza dal chantun Grischun.»

Project persistent cun ina construcziun en lain
L'architect chantunal Andreas Kohne ha accentuà ils avantatgs architectonics dal project: «L'edifizi nov ademplescha fitg bain tut las pretensiuns previsas per il manaschi d'in center d'instrucziun.» L'edifizi da lain cun trais plauns persvadia plinavant cun ses concept da construcziun persistent ch'è orientà al futur. Perquai ch'igl è vegnì utilisà bler lain e betun reciclà sa reduceschan la cumpart d'energia grischa e las emissiuns CO₂ da l'edifizi. Las pumpas da stgaudar e la buna mantellada da l'edifizi procuran ch'il consum d'energia dal manaschi vegnia minimalisà uschè bain sco pussaivel.

Planisà e realisà vegn il project da construcziun dal team da planisaders generals atelier tsu/bersa/Tao Architects Office da Cuira. Ses project «ZicZAC» ha gudagnà il zercladur 2023 la concurrenza respectiva (cf. communicaziun a las medias dals 8 da zercladur 2023).

Retratga la stad 2027
Il settember 2024 han las votantas ed ils votants dal Grischun approvà cun passa 77 pertschient il credit d'impegn da 18,95 milliuns francs per il project «Nov center d'instrucziun da la protecziun civila Meiersboda Churwalden». Las emprimas publicaziuns uffizialas per quest project da construcziun èn vegnidas fatgas l'enviern 2024/2025. Tar las surdadas da las lavurs per la construcziun brutta e per la tecnica da chasa han pudì vegnir resguardadas per gronda part interpresas localas. Il nov center d'instrucziun da la protecziun civila duai vegnir retratg la stad 2027.

Visualisaziun:

© atelier tsu/bersa / Tao Architects Office, Cuira

Foto 2, Foto 3, Foto 4, Foto 5

Agiunta:

CPC flyer d'infurmaziun davart la construcziun

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 15.00 fin las 15.30), e‑mail Carmelia.Maissen@diem.gr.ch
• Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 12.00 fin las 13.00), e‑mail Andreas.Kohne@hba.gr.ch

Responsabladad: Uffizi da construcziun auta