La Regenza ha garantì a l'Institut da perscrutaziun AO Tavau ina contribuziun chantunala e renovà l'incarica da prestaziun. Ultra da quai ha ella deliberà il program d'aglomeraziun Tavau.
Contribuziun chantunala per perscrutaziun internaziunala d'emprima qualitad a Tavau
La
Regenza ha garantì a la fundaziun Institut da perscrutaziun AO Tavau (ARI) ina
contribuziun chantunala da totalmain 1,6 milliuns francs per ils onns 2025 fin
2028. Plinavant vegn l'incarica da prestaziun existenta, che scada la fin da
l'onn 2024, prolungada fin l'onn 2028.
L'Institut da perscrutaziun AO Tavau è ina part da la
Fundaziun AO. Quella è ina da las pli impurtantas organisaziuns da perscrutaziun
e da scolaziun medicinala sin l'entir mund, quai en il champ dal tractament
chirurgic da ruttadiras e da malsognas da l'ossa. Ses champs d'activitad
tanschan da la perscrutaziun da basa sur il svilup da products fin a la
validaziun clinica ed a la valurisaziun. La fundaziun è oz ina rait globala cun
passa in mez milliun spezialistas e spezialists medicinals e porscha a sias
commembras e ses commembers – ultra da la colliaziun mundiala – er
pussaivladads da scolaziun e da perfecziunament sco er l'access als resultats
actuals da perscrutaziun. Mintga onn sa participeschan passa 70 000 persunas da l'entir mund a var 850 occurrenzas da perfecziunament che vegnan
sustegnidas da bunamain 8000 docentas e docents. Ils princips e las tecnicas da
lavur che la Fundaziun AO ha sviluppà èn ina pitga fundamentala da la chirurgia
d'accidents moderna. Il ARI è il pli grond institut ed ina da las pli
impurtantas pitgas da la AO Foundation. La reputaziun scientifica excellenta
dal ARI sco er sias colliaziuns e sias cooperaziuns sin tut il mund, entaifer
ed ordaifer la cuntrada da perscrutaziun, contribueschan essenzialmain a la
reputaziun internaziunala dal chantun Grischun e da Tavau sco plazza da
perscrutaziun impurtanta.
© AO Foundation, Communications & Events
La Regenza ha garantì a la fundaziun Institut da perscrutaziun AO Tavau (ARI) ina contribuziun chantunala da totalmain 1,6 milliuns francs per ils onns 2025 fin 2028.
Deliberà il program d'aglomeraziun Tavau per l'examinaziun tras la Confederaziun
La
Regenza ha deliberà il program d'aglomeraziun Tavau. Ussa vegn quest program
inoltrà a la Confederaziun. Quella examinescha il program. Sch'il resultat da
l'examinaziun è positiv, po la Confederaziun sa participar cun 30 fin 50 pertschient als custs da las infrastructuras da traffic. Il program cuntegna
bundant 70 mesiras en ils secturs abitadi, cuntrada e traffic. Uschia pon
problems da traffic enconuschents vegnir meglierads a lunga vista ed en moda
cumplessiva.
Links:
La Regenza ha deliberà il program d'aglomeraziun Tavau.
