Tenor la Regenza è la svelta e fitg buna superaziun da catastrofas e da situaziuns d'urgenza da gronda impurtanza per il chantun Grischun. En las revisiuns parzialas da las Leschas davart la protecziun da la populaziun e davart la protecziun civila integrescha ella perquai las enconuschientschas da crisas e da situaziuns d'urgenza dals ultims onns. La Regenza ha deliberà las missivas correspundentas per mauns dal Cussegl grond.

Las adattaziuns proponidas prevesan, che las vischnancas pon engaschar da nov explicitamain er stabs directivs regiunals per dumagnar eveniments, sch'ellas vulan quai. Las vischnancas da l'Engiadin'Ota e da la regiun Moesa èn s'organisadas uschia gia durant la pandemia da COVID-19. Er la superaziun da las malauras en il Mesauc dal zercladur 2024 è vegnida coordinada dal Stab directiv regiunal. Ils stabs directivs regiunals han las medemas incumbensas e cumpetenzas sco ils stabs directivs communals sin il medem territori. Sche las vischnancas sa decidan per in stab directiv regiunal, surpiglia quel la direcziun en la regiun correspundenta empè dals singuls stabs directivs communals. Questa adattaziun duai suttastritgar l'impurtanza da la collavuraziun intercommunala en cas da catastrofas.

Er en l'avegnir vegn la Polizia chantunala ad esser preschenta al lieu da donn sco partenaria da la protecziun da la populaziun. Ella vegn a surpigliar la direcziun dal Stab directiv chantunal en la fasa acuta da situaziuns extraordinarias, dentant mo en num da l'uffizi responsabel per la protecziun da la populaziun, fin che tal surpiglia questa funcziun.

Recrutar supplementarmain cader da la protecziun civila
Cun in sistem d'impuls en la Lescha davart la protecziun civila dal chantun Grischun duain en l'avegnir vegnir acquistadas dapli persunas da cader per la protecziun civila. Quai duai franar la reducziun dal dumber d'appartegnents da la protecziun civila.

Il 1. da schaner 2021 è entrada en vigur sin plaun federal la Lescha davart la protecziun da la populaziun e davart la protecziun civila. En il Grischun fiss per consequenza il dumber d'appartegnents da la protecziun civila (AdPC) sa reducì massivamain, sch'ins n'avess betg prendì cuntramesiras correspundentas ils ultims onns, sco per exempel quella da prolungar l'obligaziun da far servetsch da protecziun civila. Perquai che la protecziun civila sto sa concentrar en l'avegnir – pervia da las stgarsas resursas persunalas – sin sias incumbensas centralas, vegnan organisaturas ed organisaturs d'occurrenzas a stuair tschertgar pli savens persunal supplementar.

Rolla impurtanta da la protecziun civila per il chantun Grischun
En il chantun Grischun cun sias 150 vals e cun ses abitadis decentrals ha la protecziun civila ina impurtanza speziala per superar catastrofas e situaziuns d'urgenza. Igl è fitg impurtant che la protecziun civila, sco partenaria ferma, possia gidar las organisaziuns a glisch blaua a superar situaziuns spezialas ed extraordinarias, ch'ella possia substituir quellas ed uschia garantir la capacitad d'intervenziun.

Agiuntas:

Missiva tar la revisiun parziala da la Lescha davart la protecziun da la populaziun
Missiva tar la revisiun parziala da la Lescha davart la protecziun civila

Infurmaziuns:

Cusseglier guvernativ Peter Peyer, schef dal Departament da giustia, segirezza e sanadad, tel. +41 79 629 00 85 (cuntanschibel da las 11.00 fin las 12.00), e‑mail Peter.Peyer@djsg.gr.ch