L'ambassadura spagnola, Celsa Nuño Garcìa, ha visità oz – sin invitaziun da la Regenza – il chantun Grischun.

L'ambassadura Celsa Nuño Garcìa è vegnida beneventada oz en la Chasa grischa a Cuira dal president da la Regenza Marcus Caduff, dal chancelier Daniel Spadin e da l'incumbensà per relaziuns externas Dominik Hemmi. L'ambassadura è vegnida accumpagnada da Fernando Jiménez, il cusseglier d'ambassada per dumondas culturalas e da Juan Díez Gibson, il cussegliader per furmaziun. Suenter il barat dals salids uffizials è in gentar cuminaivel stà sin il program.

La Regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan discutadas savens dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada:

Da sanestra: Antonio Serrano Gonzáles, Fernando Jiménez, il chancelier Daniel Spadin, l'ambassadura Celsa Nuño Garcìa, il president da la Regenza Marcus Caduff, Juan Díez Gibson e Dominik Hemmi