A partir d'immediat communitgescha il chantun Grischun sin il chanal da messenger WhatsApp. Cun il nov chanal da communicaziun vuless l'administraziun chantunala oravant tut cuntanscher persunas che na vulan betg esser activas sin ils chanals da social media classics. En il medem pass terminescha il chantun Grischun sia communicaziun sin l'account «X» @kantongr.
Il chantun Grischun vul communitgar sin ils chanals, nua che sias burgaisas e ses burgais s'infurmeschan. Perquai èsi evident ch'el è a partir d'immediat er preschent sin WhatsApp, ch'è la plattafurma sociala la pli frequentada en Svizra. Las abunentas ed ils abunents dal nov chanal da WhatsApp chantunal survegnan ina giada per emna ina resumaziun da las pli impurtantas communicaziuns ed infurmaziuns dal chantun Grischun.
Las persunas interessadas pon abunar il chanal via www.gr.ch/WhatsApp.li.
Cumplettaziun d'ina preschientscha sistematica en las medias socialas
Per incumbensa da la Regenza examinescha la Chanzlia chantunala cuntinuadamain, tge chanals che la populaziun utilisescha e tge plattafurmas ch'èn adattadas per la communicaziun dal chantun Grischun. En il rom d'in project da pilot, che dura per entant 1 onn, amplifitgescha il chantun perquai intenziunadamain sia preschientscha en las medias socialas cun in chanal da messenger. Uschia reagescha il chantun sin la situaziun ch'ina part da la populaziun è en in tschert senn e per motivs persunals pli e pli unfisa da las medias socialas. Sin il chanal da WhatsApp consumeschan las utilisadras ed ils utilisaders ils cuntegns en moda anonima, betg sco sin ils chanals da social media classics. Il chanal da WhatsApp dal chantun Grischun po vegnir abunà a partir d'immediat.
Focus sin qualitad e sin derasaziun
Cun ses account «X» @kantongr n'è il chantun Grischun percunter betg pli activ. Perquai che sia derasaziun e la rata d'interacziuns èn sa reducidas fermamain, perda quest chanal dapi mais sia relevanza per la communicaziun chantunala. Cun lantschar il chanal da WhatsApp, concentrescha il chantun sias resursas sistematicamain sin ils chanals che vegnan utilisads pli savens da las gruppas en mira giavischadas.
Dapli infurmaziuns davart la preschientscha dal chantun Grischun en las medias socialas chattais Vus sut www.gr.ch/socialmedia.
Fotografia agiuntada:
Infurmaziuns:
Daniel Spadin, chancelier, Chanzlia chantunala, tel. +41 81 257 22 21 (cuntanschibel da las 14.00 fin las 15.00), e‑mail Daniel.Spadin@staka.gr.ch
Responsabladad: Regenza