En il rom da las festivitads da giubileum «500 onns Stadi liber da las Trais Lias» è in minimuseum cotschen viagià tras il Grischun l'onn 2024. 160 persunas han tschernì in object simbolic per in dals temas «esser dachasa», «Grischun» u «patria» ed han emprestà quel a l'exposiziun ambulanta. Il cudesch «Stgazis grischuns» preschenta tut ils objects rimnads e lur istorgias. El renda uschia visiblas las bleras fassettas dal Grischun sco patria.

Umans vulan raquintar istorgias. Raquintond sa metta l'uman en relaziun cun ses visavi e cun ses conturn. Per il giubileum «500 onns Stadi liber da las Trais Lias» han 160 persunas raquintà ina istorgia davart quai ch'ellas collian cun «esser dachasa», cun sa sentir protegidas e cun «patria». Ellas han tschernì in object che simbolisescha quai e l'han confidà – ensemen cun lur istorgia – sco stgazi persunal a l'exposiziun ambulanta.

Il cudesch «Stgazis grischuns»
Ils dis da rimnada durant la turnea ha il team da l'exposiziun ambulanta prendì en deposit ils «stgazis». Durant quests bels inscunters han els pudì tadlar blers raquints persunals. Bellezzas da la natira, objects ertads, regurdanzas da l'uffanza, musica u aventuras tut spezialas: la collecziun è multifara e maina tras las linguas e las regiuns dal chantun. Il cudesch preschenta ils 160 objects rimnads ensemen cun lur istorgias. La collecziun da stgazis vegn cumplettada cun ina contextualisaziun istorica, cun infurmaziuns supplementaras davart il minimuseum e sia turnea sco er cun objects tschernids da 75 instituziuns culturalas che han accumpagnà l'exposiziun ambulanta sin ses viadi.

Il cudesch, edì da l'Uffizi da cultura dal Grischun, po vegnir retratg tar la chasa editura Somedia.

Tut ils objects e lur istorgias pon ins anc vesair fin la fin d'emna da Pasca, ils 21 d'avrigl 2025, en l'exposiziun speziala dal Museum retic.

Agiuntas:

• Illustraziun da la cuverta
  
• Exempel d'ina pagina dadens

Fotografias:

Foto 2, Foto 3, Foto 4, Foto 5, Foto 6

Infurmaziuns:

Dumondas en connex cun las festivitads da 500 onns:

• Cusseglier guvernativ dr Jon Domenic Parolini, schef dal Departament d'educaziun, cultura e protecziun da l'ambient, e‑mail Jondomenic.Parolini@ekud.gr.ch
• Daniel Camenisch, manader dal project «500 onns Stadi liber da las Trais Lias», tel. +41 78 659 63 60, e‑mail camenisch@vinavant.ch

Dumondas davart il cudesch e davart l'exposiziun ambulanta:

• Dr. Christoph Luzi, manader dal project parzial Exposiziun ambulanta, tel. +41 78 930 36 21, e‑mail luzi@clu-cultur.ch

Responsabladad: Departament d'educaziun, cultura e protecziun da l'ambient