Il chantun Grischun vul impedir che plantas ed animals exotics, sco per exempel la conchiglia quagga, vegnian importads en las auas grischunas. Perquai prepara el l'introducziun d'ina obligaziun d'annunziar e da nettegiar bartgas: Las manischunzas ed ils manischunzs ston en l'avegnir annunziar la midada da lur bartga immatriculada d'ina aua en in'autra e nettegiar la bartga, avant che laschar quella en l'aua.

Cun introducir in'obligaziun d'annunziar e da nettegiar bartgas reagescha il chantun sin il fatg, che las auas èn pli e pli periclitadas tras spezias invasivas da plantas e d'animals, sco per exempel la conchiglia quagga, il giombregl assassin ubain il gobiun nairin. Questas spezias vegnan derasadas savens senza vulair, per exempel vi dal bist da la bartga u en l'aua che vegn transportada en las bartgas da temp liber. Ellas pon chaschunar enorms donns ecologics en las auas ubain stuppar conducts d'aua. L'obligaziun d'annunziar e da nettegiar bartgas vegn a valair per las bartgas immatriculadas. Las bartgas senza numers d'immatriculaziun sco er ils urdains da sport d'aua vegni vinavant recumandà da nettegiar conscienziusamain mintga giada avant ch'ins mida d'ina aua en in'autra.

Parallelamain cun auters chantuns
Cun quest pass s'affiliescha il chantun Grischun als chantuns da la Svizra Centrala ed al chantun Berna, che han gia introducì l'onn 2024 in'obligaziun d'annunziar e da nettegiar bartgas. Cun metter a disposiziun ina simpla applicaziun online cumplettescha il chantun las mesiras d'infurmaziun e da sensibilisaziun, che vegnan realisadas dapi intgins onns per impedir l'import da neobiota aquatica. Las basas necessarias per introducir l'obligaziun d'annunziar e da nettegiar bartgas vegnan actualmain elavuradas. La nova reglamentaziun vegn introducida il pli baud l'avrigl 2025, uschespert che l'applicaziun online è disponibla er per il Grischun e ch'ils posts da nettegiament autorisads èn designads. En il fratemp vegni appellà a las manischunzas ed als manischunzs da bartgas da desister da midar lur bartga d'ina aua en in'autra u da la nettegiar conscienziusamain en cas d'ina midada en in'autra aua.

Dapli infurmaziuns:

Neobiota en auas

Fotografia:

© Eawag, Linda Haltiner

Infurmaziuns:

Sascha Gregori, , incumbensà per neobiota, Uffizi per la natira e l'ambient, tel. +41 81 257 29 87 (cuntanschibel da las 08.00 fin las 12.00), e‑mail Sascha.Gregori@anu.gr.ch