Durant ils firads da primavaira èsi da far quint cun dapli traffic per lung da l'autostrada A13. Per garantir la circulaziun dal traffic e per minimar il traffic da guntgida sin las vias chantunalas fa l'Uffizi da construcziun bassa dal Grischun diever da mesiras cumprovadas.

Perquai che las mesiras realisadas la primavaira 2024 per lung da la A13 èn sa cumprovadas, vegn l'Uffizi da construcziun bassa dal Grischun (UCB) ad applitgar durant ils firads da primavaira 2025 (Pasca, Ascensiun, Tschuncaisma) in concept da traffic cumparegliabel sco l'onn precedent. Il concept cumpiglia mesiras per lung da la A13 – tut tenor il volumen da traffic – da Zizers fin al tunnel Isla Bella. Per il traffic da return en direcziun nord èn previsas mesiras tranter Tusaun e Rehanau.

Concretamain vul quai dir, ch'il traffic vegn dosà en plirs lieus per lung da la A13 – saja quai tras persunal u cun agid dad amplas da traffic. La finamira è quella da minimar il traffic da guntgida da l'autostrada sin la via chantunala, da meglierar la circulaziun dal traffic en ils vitgs, da garantir che las organisaziuns a glisch blaua ed il traffic public possian passar senza impediments sco er da proteger la populaziun locala cunter immissiuns supplementaras.

Durant quests dis stoi vegnir fatg quint cun bler traffic
Perquai che Pasca è tard quest onn e croda, en bleras vischnancas dal chantun, en las vacanzas da scola, na ston betg vegnir spetgadas grondas interferenzas cun il manaschi da sport d'enviern. Uschia èsi pussaivel, ch'il traffic sa reparta in pau meglier che durant auters onns. Però po il fatg che las vacanzas a Baden-Württemberg (Germania) han lieu il medem mument, chaschunar ina concentraziun pli gronda a la fin da las vacanzas ils 27 d'avrigl 2025.

Per il traffic che charrescha en direcziun sid stoi da princip vegnir fatg quint cun dapli traffic in di avant il firà sco tal sco er il firà sez:

• gievgia, ils 17 d'avrigl 2025 avant Pasca, circa a partir da las 15.00
  venderdi sontg, ils 18 d'avrigl 2025, circa durant mezdi 
• mesemna, ils 28 da matg 2025 avant Ascensiun, circa a partir da las 15.00
  gievgia (Ascensiun), ils 29 da matg 2025, circa durant mezdi
• venderdi, ils 6 da zercladur 2025 avant Tschuncaisma
  sonda, ils 7 da zercladur 2025, circa durant mezdi
  

L'experientscha mussa ch'il traffic da return vers nord sa reparta meglier sur il di ch'il traffic da vacanzas en direcziun sid. Per il traffic da return stoi vegnir fatg quint cun in grond volumen da traffic durant ils suandants dis:

• glindesdi, ils 21 d'avrigl 2025 (glindesdi da Pasca)
• dumengia, ils 27 d'avrigl 2025 (fin da las vacanzas en il Grischun ed a Baden-Württemberg [Germania])
• dumengia, il 1. da zercladur 2025 suenter Ascensiun
• glindesdi, ils 9 da zercladur 2025 (glindesdi da Tschuncaisma)

Il cumportament da las participantas e dals participants dal traffic ha grondas consequenzas
DIl UCB cusseglia a tut las participantas ed ils participants dal traffic da viagiar sche pussaivel ordaifer las uras da grond traffic u d'evitar dal tuttafatg quests dis. Da princip recumonda il UCB da sviar al traffic public sin binaris.

Infurmaziuns:

Andreas Pöhl, manader Gestiun dal traffic, Uffizi da construcziun bassa dal Grischun, tel. +41 81 257 37 62 (cuntanschibel da las 08.00 fin las 11.00), e‑mail Andreas.Poehl@tba.gr.ch