Ils ultims mais è la conjunctura grischuna sa sminuida vinavant, ma cunzunt en l'industria è la dinamica negativa daventada pli debla. Las aspectativas da las interpresas per ils proxims mais restan modestas. Quai mussan ils resultats da l'ultim monitoring da la conjunctura grischuna.

Fin ussa è l'onn 2009 stà in veritabel "annus horribilis" per l'industria grischuna. Ils exports nominals èn sa reducids durant l'emprim mez onn per betg main che 46.25% ed er ils imports èn sa sminuids per bunamain 39%. Questa reducziun, che sa chatta sur la media svizra, ha gist puspè "traguttì" ils augments considerabels dals ultims pèr onns.
Tenor las retschertgas da l'institut per la perscrutaziun da la conjunctura (KOF) para la situaziun da l'industria grischuna dentant da sa calmar plaunsieu; tant il dumber da las empustaziuns entradas sco er il volumen da las incumbensas èn sa reducids mo pauc l'ultim temp. Sin in nivel bass sa chatta percunter vinavant la producziun. Per il proxim mez onn quintan ils manaschis industrials grischuns cun ina stabilisaziun u cun in'ulteriura pitschna diminuziun da la situaziun da las fatschentas; la producziun dastgass dentant puspè s'augmentar plaunsieu. Il punct conjunctural il pli bass dastgass tut en tut esser cuntanschì bainbaud, cumbain che las incumbensas da l'exteriur èn anc fitg raras.

Per la branscha grischuna da construcziun n'è l'onn 2009 betg stà in nausch onn fin ussa. Er il segund quartal èn las impressarias ed ils impressaris stads cuntents cun la situaziun actuala da lur fatschentas; l'activitad da construcziun è stada tut en tut mo pauc pli pitschna che l'onn 2008, ch'è stà in onn da construcziun excellent. Entant ch'igl è avant maun lavur avunda per questa stad, datti - en vista a l'atun - plaunet adina dapli vuschs che fan quint cun ina reducziun da la dumonda. Gia dapi in temp percepescha la branscha da construcziun ina pitschna pressiun sin ils pretschs da vendita.

Durant l'emprima mesadad da l'onn 2009 ha l'hotellaria grischuna dumbrà 7.5% damain pernottaziuns che l'onn 2008, ch'è stà in onn excellent. Per l'entira stagiun da stad vegni fatg quint cun ina reducziun en la medema dimensiun. Per la gronda maioritad da las hotelieras e dals hoteliers ch'èn vegnids interrogads en il rom dal test da conjunctura dal KOF è la situaziun actuala da las atgnas fatschentas anc cuntentaivla; per il proxim mez onn vegni dentant fatg quint cun in pegiurament, e quai er en vista al pitschen dumber da reservaziuns ch'eran avant maun il di da referenza. Er ils restaurants pateschan da la situaziun precara areguard il consum. 30% dals manaschis grischuns dumandads han cuntanschì retgavs cleramain pli pitschens durant il segund quartal. Er las gastronomas ed ils gastronoms guardan scepticamain sin il segund mez onn.

Las detaglistas ed ils detaglists sentan la recessiun cunzunt en furma da pli pauca clientella; las svieutas èn dentant sa reducidas mo pauc il cumenzament da la stad. Per la segunda mesadad da l'onn na vegni betg fatg quint cun midadas pli grondas.

Sco ch'igl è vegnì enconuschent a la fin da l'emna passada, è la situaziun sin il martgà da lavur grischun relativamain stabila, e quai er per motivs stagiunals. La fin da fanadur eran registradas en il Grischun 1'553 persunas dischoccupadas. Quai correspunda ad ina quota dad 1.5% (Svizra: 3.7%).

Il monitoring actual da la conjunctura grischuna cun infurmaziuns pli detagliadas pudais Vus consultar e chargiar giu da la pagina d'internet da l'uffizi per economia e turissem ( www.awt.gr.ch -> Deutsch -> Aktuelles).

Infurmaziuns
Patrick Casanova, uffizi per economia e turissem, 081 257 23 74

Gremi: uffizi per economia e turissem
Funtauna: rg uffizi per economia e turissem