Gia per la 16avla giada ha lieu il di europeic dal monument en 48 pajais da l'Europa. La tgira da monuments dal Grischun, la protecziun da la patria dal Grischun dal sid ed il center da cultura NAIRS a Scuol envidan per la fin d'emna dals 12 e 13 da settember a questa manifestaziun en l'Engiadina bassa, nua ch'ins po scuvrir stabiliments che stattan en connex cun l'aua.

Il di europeic dal monument è deditgà quest onn a l'ierta architectonica e culturala che sa chatta sper l'aua u che stat en in connex cun questa resursa natirala. Per il svilup da l'Engiadina han l'aua ed il turissem da bogns, ch'è sa sviluppà sin basa da l'aua, ina gronda impurtanza en tuts reguards. La cura da bogn e la cura da baiver aua tutgan tar las praticas curativas las pli veglias. Uschia èn er ils emprims gronds hotels a Scuol/Nairs – ma er a San Murezzan – vegnids construids la mesadad dal 19avel tschientaner directamain sper l'aua.

Da la chasa da cura da Tarasp ...
Las funtaunas "Bonifazi", "Carola", "Emerita" e "Luzi" eran enconuschentas pli baud sin l'entir mund ed han attratg numerusas turistas e numerus turists d'aua en l'Engiadina bassa. Ina spassegiada tras il fenomen geologic interessant da la chavorgia da l'En a Nairs maina las persunas interessadas a las funtaunas, ma er al geisir ch'è oz exaurì. Uschia emprendan ellas ad enconuscher la "architectura da l'aua".
Curt suenter che la chasa da cura dal Bogn Tarasp era vegnida averta l'onn 1865, èn ils patruns da construcziun sa decidids da construir ina nova "halla da baiver" da l'autra vart da l'En. Al pe d'ina paraid-crap stippa sur l'En ha Bernhard Simon construì da 1874 fin 1876 l'edifizi istoristic cun il lung corridor, la "Büvetta".

Il center da cura da Tarasp è vegnì erigì sin la terrassa topografica da Vulpera vers la fin dal 19avel tschientaner tras ils frars Duri e Chasper Pinösch dad Ardez. Ils onns 1896 e 1897 han els construì l'hotel da cura Waldhaus. Quest grandhotel e sia terrassa han purschì als giasts da cura in alloschi exclusiv cun in panorama magnific sur l'En. Karl Koller ha construì l'hotel Schweizerhof da 1898 fin 1900. En il fratemp hai dà differentas midadas da construcziun, tranter auter in engrondiment ils onns 1913 e 1914 tras J. Weidmann. Ils saluns e las salas da mangiar disponan da ritgas decoraziuns da jugendstil.
Il bogn avert cunfinant da Vulpera è vegnì avert l'onn 1930 sco in dals emprims stabiliments da quest gener en Svizra.

... a l'anteriura chasa da bogns a Nairs
L'anteriura chasa da bogns da Valentin Koch e dad Ernst Seiler a Nairs, ch'è oz il center da cultura NAIRS, è vegnida averta l'onn 1913. L'edifizi lung cun ina loggia s'extenda sur l'entira vart da l'entrada. En il plaunterren sa chattavan bogns e locals da quietezza. En l'emprim plaun eran indrizs d'idroterapia cun bogns d'aria chauda e fraida e cun applicaziuns electricas sco er locals d'inhalaziun. Grazia a pliras funtaunas en la proxima vischinanza era la chasa da cura spezialmain attractiva per excursiuns termalas. Sco chasa d'art internaziunala e sco center da cultura regiunal per art contemporan è il center NAIRS dentant activ dapi passa 20 onns en la producziun, en la preschentaziun ed en l'intermediaziun d'art. Las visitadras ed ils visitaders sa scuntran qua cun in'ovra principala da l'architectura neoclassicistica dal Grischun.

Ultra dals edifizis ch'èn vegnids construids per las curas da baiver aua e per las curas da bogn vegnan mussadas al di dal monument bleras differentas punts che s'integreschan armonicamain en la cuntrada da l'En. Suenter la punt da lain cun tetg a Nairs èn vegnidas construidas punts da fier per vias e per sendas, e novissimamain vegn erigida ina nova punt auta per Vulpera.

Far ina cura vuleva dir pli baud: spassegiar tar las singulas funtaunas, baiver lur aua frestga e sa trategnair al lieu. Il maletg dal vitg da Scuol è caracterisà dal stradun flancà d'aleas, da las magnificas chasas engiadinaisas, dals hotels e da las plazzas attractivas cun lur bigls.

Il chastè imposant da Tarasp, ch'è vegnì construì enturn l'onn 1040, ha survegnì ses num da ses abitants oriunds, dals signurs da Tarasp. Incumparegliabla è sia posiziun sin in crest che dominescha la val. La cumparsa actuala dal stabiliment è caracterisà fermamain da las lavurs da reconstrucziun dal cumenzament dal 20avel tschientaner sut Karl August Lingner, il possessur da quella giada. Il mobigliar sa cumpona da tocs prezius che derivan da differentas epocas e da l'entira Europa centrala.

In di da giudair
Dapi ch'el è vegnì realisà l'emprima giada l'onn 1994, è quest di sa sviluppà a l'occurrenza la pli gronda en il sectur da la sensibilisaziun per il mantegniment da bains culturals. L'occurrenza ha la finamira da svegliar tar in vast public l'interess per noss bains culturals e per lur mantegniment. En passa 100 differents lieus da tut la Svizra èn persunas interessadas envidadas da sa participar a turas guidadas, a visitas d'ateliers e da plazzals, ad excursiuns sco er a bleras autras occurrenzas.

Las visitas dal di dal monument vegnan organisadas en emprima lingia dals posts spezialisads federals, chantunals e municipals per la tgira da monuments e per l'archeologia. Els tschernan mintga onn ils objects, contacteschan las proprietarias ed ils proprietaris ed organiseschan las turas guidadas e las occurrenzas al lieu. Il center NIKE è responsabel per la coordinaziun da las var 200 occurrenzas en l'entira Svizra, per la lavur naziunala da medias e da publicitad sco er per la publicaziun dal program en furma da broschura ed en l'internet.

Il di europeic dal monument è ina manifestaziun culturala che vegn lantschada uffizialmain dal cussegl da l'Europa. El vegn er sustegnì da l'uniun europeica. Il di dal monument ha lieu en 48 pajais europeics.

Infurmaziuns
Marcus Casutt, tgirader chantunal da monuments, uffizi da cultura, tel. 081 257 27 91

Gremi: uffizi da cultura
Funtauna: rg uffizi da cultura