En il chantun Grischun vegnan las pajataglias ed ils pajataglias distgargiads en l'avegnir en differents secturs. La regenza grischuna ha mess en vigur l'emprima part da la revisiun parziala da la lescha da taglia per il cumenzament da l'onn 2010. Da la reducziun da las taglias profitan tranter auter famiglias ed interpresas.

Il cussegl grond ha concludì la revisiun parziala da la lescha da taglia per il chantun Grischun ils 18 da zercladur 2009. Il termin da referendum è scadì ils 23 da settember. Entaifer quest termin n'èn vegnids inoltrads nagins referendums. La regenza ha uss mess en vigur l'emprima part dal project per il 1. da schaner 2010. Tras quai vegnan las pajataglias ed ils pajataglias distgargiads en differents secturs. Ultra da quai vegn fatga in'adattaziun al dretg federal da la lescha chantunala da taglia.

La gulivaziun da la progressiun fraida vegn realisada gia tar ina midada da l'index naziunal dals pretschs da consum da 3 pertschient (enfin ussa 10 pertschient). Da questa mesira, che s'effectuescha gia per il 1. da schaner 2010, profitan tut las pajataglias e tut ils pajataglias, cunquai che entradas pli autas n'han betg pli per consequenza ina grevezza fiscala procentualmain pli auta. Tar la confederaziun vegn la gulivaziun da la progressiun fraida realisada a partir da l'onn 2011.

Las famiglias vegnan distgargiadas
Ils augments da la deducziun per l'assistenza dals uffants ordaifer la famiglia sin maximalmain 10'000.– francs (fin ussa 6'000.– francs) e da las deducziuns per uffants laschan profitar fitg las famiglias da la revisiun. Las novas deducziuns per uffants importan:

- per uffants da la vegliadetgna prescolara 6'000.– francs (fin ussa 5'000.– fr.)
- per uffants minorens pli vegls e per uffants en scolaziun 9'000.– francs (fin ussa 8'000.– fr.)
- per uffants en scolaziun ordaifer 18'000.– francs (fin ussa 14'000.– fr.)

Plinavant chaschuna la revisiun parziala distgargias tar la taglia sin la facultad, d'ina vart cun augmentar ils imports libers da taglia, da l'autra vart cun reducir la grevezza maximala.

La taglia sin il gudogn per interpresas vegn reducida a 5.5 pertschient
Cun reducir la taglia sin il gudogn da las persunas giuridicas da 7 pertschient a 5.5 pertschient mantegna il Grischun sia cumpetitivitad internaziunala. Cun questa tariffa da taglia bassa prenda il chantun cumià da la tariffa progressiva vertenta e mida ad ina tariffa da taglia proporziunala, sco ch'ella exista er tar la confederaziun e tar numerus auters chantuns.

Ulteriurs puncts da revisiun concernan la simplificaziun da l'imposiziun da taglia supplementara en cas da ierta (uschenumnada amnestia d'ierta) e la denunzia da sasez na chastiabla en cas d'omissiun fiscala. E cun l'aboliziun da la pratica da Dumont pon las pajataglias ed ils pajataglias, che s'acquistan ina immobiglia che sto vegnir renovada, deducir ussa ils custs da reparaziun.

Entradas pli pitschnas
Ils puncts da revisiun ch'èn vegnids mess en vigur per il cumenzament da l'onn 2010 chaschunan a lunga vista entradas pli pitschnas da mintgamai circa 29 milliuns francs per il chantun e per las vischnancas. 12.5 milliuns francs importan las distgargias planisadas tar la taglia sin la facultad, 11 milliuns francs la reducziun da la taglia sin il gudogn. Perditas da rendita supplementaras en la summa da var 12 milliuns francs èn la consequenza dal fatg che la progressiun fraida vegn gulivada pli svelt.

La segunda part da la revisiun pertutga la refurma da la taglia sin interpresas II; questa taglia vegn ad entrar en vigur l'onn 2011 ensemen cun las disposiziuns da la taglia federala directa.

Infurmaziuns:
- cusseglier guvernativ Martin Schmid, schef dal departament da finanzas e vischnancas, tel. 081 257 32 01
- Urs Hartmann, schef da l'administraziun da taglia, 081 257 33 24

Gremi: regenza
Funtauna: rg chanzlia chantunala dal Grischun