En vista al fatg ch'i dat adina dapli violenza a chaschun d'occurrenzas da sport, èn la cussegliera guvernativa Barbara Janom Steiner ed il president dal club da hockey da Tavau (HCD), cusseglier naziunal Tarzisius Caviezel, sa scuntrads per ina discussiun. Il proceder che la conferenza da las directuras e dals directurs chantunals da giustia e polizia propona per cumbatter la violenza a chaschun d'occurrenzas da sport, vegn sustegnì. Perquai ch'i dat paucs problems en il Grischun e cunquai che quels sa laschan cumbatter en moda consequenta cun las pussaivladads existentas, pon las autoritads desister d'ulteriuras mesiras che chaschunan gronds custs.

Las discussiuns davart mesiras adattadas cunter violenza a chaschun da gieus da ballape e da hockey han lieu er en il Grischun. Per quest intent èn la scheffa dal departament da giustia, segirezza e sanadad, cussegliera guvernativa Barbara Janom Steiner, ed il cumandant da la polizia chantunala dal Grischun, dr. Markus Reinhardt, sa scuntrads dacurt cun il president e cun il vicepresident dal HCD, cusseglier naziunal Tarzisius Caviezel e Gaudenz F. Domenig. En quest connex hai pudì vegnir constatà che la situaziun en il Grischun n'è betg uschè inquietanta sco en las aglomeraziuns da Turitg, da Berna, da Basilea u da Son Gagl. Unanimamain vegnan intgins paucs gieus da hockey e var duas dunsainas da fans ch'èn pronts d'utilisar violenza e che chaschunan acziuns da polizia, giuditgads sco problematics. Per quest motiv sa laschan per gronda part evitar intervenziuns da polizia che chaschunan gronds custs. Tuttina èn – tar mintga gieu dal HCD – en acziun polizistas e polizists da la polizia chantunala dal Grischun en ed enturn il stadion da Tavau per pudair percepir e supprimer a temp eventuals problems.

Paucs problems en il Grischun
Ch'igl existan en il Grischun per fortuna paucs problems a chaschun da gieus da hockey a Tavau, attribueschan las persunas responsablas dal chantun Grischun e dal HCD en emprima lingia al fatg che la collavuraziun tranter il HCD e la polizia chantunala dal Grischun funcziuna optimalmain. Er las basas legalas en la lescha chantunala da polizia ed en il concordat davart las mesiras cunter la violenza a chaschun d'occurrenzas da sport respectivamain en la lescha federala davart mesiras per mantegnair la segirezza interna bastan per proceder cunter persunas ch'èn prontas d'utilisar violenza. Uschia sa scuntran regularmain las persunas responsablas dal HCD ed il cumandant da polizia e scumondan en moda consequenta a persunas ch'èn prontas d'utilisar violenza d'entrar en stadions ed en tscherts areals. En vista a la situaziun relativamain nunproblematica en il Grischun na s'imponan naginas ulteriuras mesiras.

A chaschun da la discussiun èsi vegnì concludì da sa scuntrar er en l'avegnir regularmain – almain ina giada per onn – per pudair far frunt a temp ad eventuals problems. A medem temp duain er ils contacts regulars tranter la direcziun dal HCD ed il commando da polizia vegnir tgirads vinavant. D'introducir ina maisa radunda, sco quai ch'i vegn pretendì da swiss olympic, poi dentant vegnir desistì, nun che la situaziun daventass considerablamain mendra en l'avegnir.

La violenza a chaschun d'occurrenzas da sport ha procurà che differentas directuras e differents directurs chantunals da giustia e polizia han stuì sviluppar in concept per far frunt a la problematica da hooligans. A chaschun da lur conferenza d'atun han las directuras ed ils directurs chantunals da giustia e polizia approvà quest concept e prendì decisiuns da princip en quai che reguarda l'alcohol e la vendita da bigliets, l'identificaziun da persunas che utiliseschan violenza e las sancziuns cunter talas persunas sco er l'urden dal stadion. Er la participanta ed ils participants da la sesida beneventan e sustegnan expressivamain quests sforzs, er sche la situaziun en il Grischun n'è per fortuna betg uschè dramatica sco en auters chantuns.


Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01
- Tarzisius Caviezel, president dal club da hockey da Tavau, tel. 079 610 23 70


Gremi: departament da giustia, segirezza e sanadad
Funtauna: rg departament da giustia, segirezza e sanadad