La publicaziun davart las cifras dal basegn futur da forzas spezialisadas da tgira ha chaschunà agitaziun. Per enconuscher il basegn dal Grischun e per pudair impedir ina eventuala mancanza da persunal da tgira ha il chantun organisà ina "maisa radunda" e laschà elavurar in studi davart la scolaziun da tgira e davart la mancanza da persunal da tgira. Il studi mussa ch'ina mancanza da persunal è imminenta per il Grischun en il futur. La regenza examinescha ussa cuntramesiras adattadas.

Il studi ch'è vegnì fatg dal biro per studis sociopolitics e da lavur (BASS) duess servir sco basa scientifica che s'orientescha vi dals fatgs, per pudair giuditgar mesiras pussaivlas per la politica da furmaziun e per il martgà da lavur e per pudair discutar politicamain en chaussa.

Basegn supplementar a partir da l'onn 2020
Il studi dal BASS mussa en emprima lingia ch'i na dat per il mument nagina mancanza da persunal da tgira en il chantun Grischun. Però datti gia indizis che mussan che la purschida da forzas spezialisadas da tgira è stgarsa. Tras il basegn da tgira creschent ston ins er quintar en il chantun Grischun cun ina mancanza da persunal da tgira. Il studi prognostitgescha surtut per l'onn 2020 in basegn supplementar da forzas spezialisadas da tgira da radund 12.5 pertschient. Quest basegn supplementar na po betg vegnir cuvrì tenor il studi, sch'i na vegnan betg prendidas mesiras adattadas. La situaziun dal chantun Grischun è en cumparegliaziun cun l'entira Svizra relativamain buna. Per il mument sto el quintar cun ina mancanza da persunal main pregnanta.

Che la mancanza da persunal da tgira spetgada en il chantun Grischun n'è main accentuada ch'en l'entira Svizra, è tranter auter d'attribuir al fatg ch'il chantun Grischun scolescha en cumparegliaziun cun auters chantuns da la Svizra tudestga dapli forzas spezialisadas da tgira che la media. Quai vala cunzunt per la scolaziun da tgirunzas e da tgirunzs diplomads SPS. Il dumber d'emploiadas e d'emploiads spezialisads da sanadad CCS è dentant sut la media, sch'ins cumpareglia cun auters chantuns. Il studi mussa ch'i dat memia paucas plazzas d'emprendissadi per la scolaziun d'emploiadas e d'emploiads spezialisads da sanadad CCS e ch'i manca candidatas e candidats qualifitgads per pudair far la scolaziun da tgirunza u tgirunz diplomà SPS.

Diversas recumandaziuns d'agir
Il studi recumonda diversas acziuns, en spezial quellas che vegnan skizzadas qua sutvart:

• Ins sto prender mesiras, per che las forzas spezialisadas da tgira disponiblas lavurian pli ditg sin lur mastergn, ma er mesiras che han la finamira d'augmentar il dumber da las forzas da tgira spezialisadas. 
• En il sectur da la sanadad datti sin fundament dal svilup demografic (vegliandrament) ina mancanza da forzas spezialisadas da tgira. Perquai èsi da recumandar mesiras che augmentan il volumen da lavur (quota da persunas cun activitad da gudogn, grad d'occupaziun, interrupziuns da gudogn da mammas). Cunquai che radund 90 pertschient da las forzas spezialisadas da tgira èn dunnas, èsi necessari da prender mesiras per meglierar la cumpatibilitad da la professiun cun la famiglia.
• En il sectur da la scolaziun ston ins schliar il problem da profitunzs. En blers cas n'è la scolaziun da forzas spezialisadas da tgira betg rentabla ozendi tenor il studi per ils manaschis ord l'aspect economic. Quai chaschuna il problem da profitunzs, uschia ch'i vegnan la fin finala scoladas memia paucas forzas spezialisadas da tgira.

La regenza examinescha mesiras adequatas
Per ademplir il basegn d'agir ha la regenza incaricà ina gruppa da lavur interdepartamentala sut la direcziun dal president da la regenza Claudio Lardi. Quella vegn a tractar dumondas parzialas (indemnisaziuns dals practicums SPS, scolaziuns d'assistenza). Plinavant vegn er la "maisa radunda" iniziada da cussegliera guvernativa Barbara Janom Steiner a lavurar vinavant en chaussa. A la "maisa radunda" fan part tranter auter las represchentanzas da las federaziuns professiunalas e da las federaziuns da las patrunas e dals patruns (federaziun grischuna "chasas ed ospitals", federaziun da spitex, organisaziun dal mund da lavur "sanadad e fatgs socials"). Per incumbensa dal departament da giustia, segirezza e sanadad duess questa "maisa radunda" discutar davart las recumandaziuns dal studi e giuditgar, sche talas èn adattadas d'impedir la mancanza da persunal da tgira che vegn a sa mussar en il futur.


Infurmaziuns:
- president da la regenza Claudio Lardi, schef dal departament d'educaziun, cultura e protecziun da l'ambient, tel. 081 257 27 01
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun