La cumissiun predeliberanta dal cussegl grond è s'occupada da la missiva concernent la participaziun a la cunvegna interchantunala davart l'armonisaziun da las contribuziuns da scolaziun (concordat da stipendis). Ella recumonda al cussegl grond d'approvar la participaziun.

Sut il presidi da la presidenta da la cumissiun Susanne Krättli-Lori ha la cumissiun dal cussegl grond per furmaziun e cultura (CFC) predeliberà la missiva da la regenza concernent la participaziun a la cunvegna interchantunala davart l'armonisaziun da las contribuziuns da scolaziun (concordat da stipendis) per mauns dal cussegl grond che vegn a tractar questa fatschenta en la sessiun d'avrigl 2010.
Il president da la regenza Claudio Lardi, schef dal departament d'educaziun, cultura e protecziun da l'ambient, ha medemamain prendì part a la sesida da la cumissiun.

La conferenza svizra da las directuras e dals directurs chantunals da l'educaziun publica (CDEP) ha deliberà il concordat da stipendis ils 18 da zercladur 2009 ed ha silsuenter envidà ils chantuns d'iniziar la procedura da ratificaziun. D'ina vart vul il concordat realisar in'armonisaziun formala: Expressiuns dal dretg da stipendis sco "emprima scolaziun", "emprima scolaziun, che permetta da pratitgar ina professiun", "prestaziuns da terzas persunas", "domicil tenor il dretg da stipendis" u "persunas cun dretg da survegnir contribuziuns" duain vegnir definidas en moda unitara. Da l'autra vart intenziunescha il concordat er in'armonisaziun materiala cun fixar standards minimals sco p.ex. las limitas da la vegliadetgna, la durada dal sustegn u las tariffas maximalas. La participaziun al concordat porta uschia segirezza giuridica per tut las participadas e per tut ils participads. Actualmain ha mintga chantun in'atgna regulaziun concernent ils stipendis.

Il chantun Grischun è en ina situaziun confortabla quai che pertutga la participaziun a quest concordat: La lescha chantunala da stipendis ch'è vegnida revedida totalmain dal cussegl grond en la sessiun da december 2006 è confurma al concordat; i na fiss pia betg necessari da far midadas da la lescha. Il chantun Grischun ademplescha cun sia lescha da stipendis progressiva gia oz ils standards minimals en mira.

La cumissiun predeliberanta è sa fatschentada detagliadamain cun il concordat e vesa en la participaziun mo avantatgs per il chantun Grischun, en spezial dentant er avantatgs per las petentas e per ils petents. La CFC recumonda perquai – cun ina cuntravusch – al cussegl grond d'approvar la participaziun. Tenor fiss il stan actual il Grischun l'emprim chantun che declerass definitivamain sia participaziun al concordat da stipendis. Il concordat va dentant en vigur mo, sche almain 10 chantuns sa participeschan.


Infurmaziuns:
Susanne Krättli-Lori, cumissiun per furmaziun e cultura, tel. 078 668 01 63


Gremi: cumissiun per furmaziun e cultura
Funtauna: rg cumissiun per furmaziun e cultura