La cumissiun da gestiun dal cussegl grond (CdG) ha finì sias retschertgas dal cas Reinhardt. Ils resultats ha ella formulà en in rapport en scrit. En quel mussa la CdG, nua ch'i na pon vegnir fatgas naginas renfatschas a la regenza ed al schef resp. a la scheffa dal departament ch'è cumpetent per la polizia chantunala en quai che concerna lur agir en chaussa e nua ch'in auter proceder avess gì dapli success tenor ses avis. En vista a l'avegnir formulescha la CdG recumandaziuns en trais secturs. Il cussegl grond vegn a tractar il rapport da la CdG en la sessiun d'avrigl.

Ils 26 da schaner 2010 è il cumandant da la polizia chantunala dal Grischun, colonel dr. Markus Reinhardt, sa privà da la vita. En il rom da la surveglianza parlamentara ha la cumissiun da gestiun dal cussegl grond (CdG) examinà la gestiun da la regenza sco er tala dal schef resp. da la scheffa dal departament ch'è responsabel per la polizia chantunala dals onns 2003 fin 2010. Per quai ha ella installà ina giunta speziala che vegn presidiada dal deputà Marcus Caduff, PCD, ed a la quala appartegnan las suandantas commembras ed ils suandants commembers da la CdG: deputà Jakob Barandun, PLD; deputada Agnes Brandenburger-Caderas, PPS; deputada Tina Gartmann-Albin, PS; deputà Cristiano Pedrini, PBD. Per sustegnair la giunta speziala en dumondas organisatoricas è vegnì engaschà l'anteriur cusseglier guvernativ dr. Christian Huber (Turitg) sco expert extern. El ha experientscha da blers onns sco inquisitur, sco procuratur public, sco president da la dretgira da giuraders e sco cusseglier guvernativ. Entaifer pauc temp ha la giunta speziala interrogà differentas persunas che han savì dar infurmaziuns sco er prendì invista da diversas actas. Ils resultats da sia retschertga ha la CdG formulà en in rapport cumplessiv e detaglià.

Sin basa da sias retschertgas è la CdG arrivada ad ina conclusiun differenziada. Ella è bain stada conscienta che l'agir da la regenza sco er dal schef resp. da la scheffa dal departament na dastga betg vegnir giuditgà or da l'optica dad oz e cun las enconuschientschas actualas. Per la CdG èn stadas decisivas las enconuschientschas che las persunas responsablas han gì da quellas uras u ch'ellas avessan stuì avair, sch'ellas avessan applitgà la premura confurm a lur obligaziun. Sut questa premissa arriva la CdG a la conclusiun che l'agir da la regenza e dal schef resp. da la scheffa dal departament responsabel è suandabel en bleras parts e ch'el na dat nagin motiv per reclamaziuns. Tenor l'avis da la CdG datti dentant secturs, nua ch'in auter agir avess gì dapli success. Uschia arriva la CdG sin fundament da sias retschertgas a la conclusiun che la regenza sco tala n'haja betg realisà la seriusitad da la problematica. Il cusseglier guvernativ dr. Martin Schmid ha – tenor l'avis da la CdG – reagì l'emprim en ina moda suandabla, cur ch'el è vegnì a savair l'onn 2004 da la problematica d'alcohol dal cumandant da la polizia. El n'ha dentant betg reagì en moda adequata cur che las tunas correspundentas èn sa tegnidas fermamain anc l'onn 2007. La CdG è da l'avis ch'el avess en quest mument stuì far cumplainamain diever da sia responsabladad directiva e pretender ina communicaziun en scrit davart ils resultats da la controlla medicinala ordinada. La cussegliera guvernativa Barbara Janom Steiner ha dentant reagì en ina situaziun difficila en ina moda ch'è per gronda part suandabla. Per la CdG ha ella dentant agì en moda memia pauc resoluta cun betg pretender dal cumandant da la polizia almain ina fixaziun en scrit da las finamiras cunvegnidas en connex cun sia problematica d'alcohol. Suenter in'analisa conscienziusa è la CdG ultra da quai arrivada a la conclusiun che la cussegliera guvernativa Barbara Janom Steiner haja agì cun cleras intenziuns ed en moda adequata avant il WEF 2010, suenter ch'ella aveva survegnì enconuschientscha ch'il cumandant da la polizia saja stà alcoholisà a chaschun da l'inspecziun dal dispositiv da segirezza dal WEF. Tar ils auters schefs dal departament ch'èn stads pli baud responsabels per la polizia chantunala n'ha la CdG constatà nagin cumportament sbaglià.

Per l'avegnir propona la CdG da reveder per part il mussavia per schefs concernent il contact cun collavuraturas e cun collavuraturs cun dependenzas. Areguard la redacziun e l'archivaziun da dossiers da persunal ed areguard il tractament d'avis e da renviaments da collavuraturas e da collavuraturs d'unitads administrativas che han in’organisaziun ierarchica dat la CdG ulteriuras recumandaziuns.

Il cussegl grond vegn a tractar il rapport da la CdG en la sessiun d'avrigl.


Infurmaziuns:
Marcus Caduff, parsura da la giunta speziala da la cumissiun da gestiun, tel. 079 304 70 91


Gremi: cumissiun da gestiun
Funtauna: rg cumissiun da gestiun