Per las acquisiziuns dal maun public vul il chantun Grischun resguardar pli fitg l'aspect da la scolaziun d'emprendistas e d'emprendists sco er l'observaziun da las cundiziuns da lavur. Il chantun ha relaschà novas directivas correspundentas. Uschia duai il maun public surpigliar ina funcziun d'exempel en quests secturs.

Il departament da construcziun, traffic e selvicultura dal Grischun, ch'è cumpetent per in'execuziun unitara da las prescripziuns da submissiun, ha edì dacurt duas novas directivas per las acquisiziuns publicas. Tras quellas vegnan ils posts da surdada incumbensads da tegnair quint pli fitg da l'aspect da la scolaziun d'emprendistas e d'emprendists en la procedura directa ed en la procedura d'invit, cur ch'els tschernan il circul d'offerentas e d'offerents. Sche pussaivel duain ils posts da surdada resguardar interpresas che porschan plazzas d'emprendissadi en ina dimensiun che correspunda a la branscha ed a la grondezza dal manaschi.
Tuttina na duai quai betg dischavantagiar ils manaschis pitschens locals u las interpresas giuvnas che n'han betg la grondezza u la structura per scolar emprendistas ed emprendists. Cun questa mesira vul il chantun – surdond incumbensas dal maun public – tegnair quint adequatamain da las prestaziuns da scolaziun da las offerentas e dals offerents ed animar en general las firmas ch'èn interessadas vi d'incumbensas, da scolar emprendistas ed emprendists.

Procurar per ina pratica d'acquisiziun ch'è socialmain supportabla
Tenor la segunda directiva duain vegnir resguardads – en cas d'acquisiziuns publicas – mo offerentas ed offerents che garanteschan e che conferman en il rom d'ina decleranza persunala, ch'els resp. lur subinterpresas u lur furnituras e lur furniturs observian almain las otg cunvegnas centralas da l'organisaziun internaziunala da lavur (OIL) che la Svizra ha ratifitgà per la protecziun da normas da lavur fundamentalas (scumond da lavur sfurzada, scumond da lavur d'uffants e.u.v.). Independentamain da las regulaziuns specificas a l'exteriur poi vegnir garantì qua tras – en quai che reguarda las prestaziuns che vegnan furnidas a l'exteriur – in standard minimal da las cundiziuns da lavur. Uschia duai vegnir evità tant sco pussaivel ch'i vegnian surdadas incumbensas che violeschan ils dretgs da lavur ils pli elementars, sco p.ex. l'installaziun da crappa da salaschada ch'è vegnida producida da mauns d'uffants. Resguardond sia funcziun d'exempel sociala vul il chantun procurar qua tras per ina pratica d'acquisiziun ch'è socialmain uschè supportabla sco pussaivel.


Infurmaziuns:
- cusseglier guvernativ Stefan Engler, schef dal departament da construcziun, traffic e selvicultura, tel. 081 257 36 01
- Orlando Nigg, servetsch giuridic, departament da construcziun, traffic e selvicultura, tel. 081 257 36 18


Gremi: departament da construcziun, traffic e selvicultura
Funtauna: rg departament da construcziun, traffic e selvicultura