Il tribunal federal svizzer n'è betg entrà en in recurs da la regenza concernent la taglia sin l'ierta. El ha constatà ch'il chantun na saja betg legitimà da far quest recurs.

En il Grischun èn per il 1. da schaner 2008 las descendentas ed ils descendents (uffants, biadias e biadis e.u.v.) vegnids liberads da la taglia sin l'ierta. Per iertas anticipadas tenor il dretg vegl, che n'èn anc betg vegnidas imponidas, ha il legislatur previs ina imposiziun a partir dal 1. da schaner 2008. En sia sentenzia dals 12 da matg 2009 ha la dretgira administrativa decidì ch'i manchia ina basa legala per suttametter las iertas anticipadas a la taglia tenor il dretg vegl.

Tenor la regenza ha la sentenzia da la dretgira administrativa betg tegnì quint da la clera voluntad dal cussegl grond. Vitiers vegniva che questa sentenzia davart la taglia sin l'ierta pudess chaschunar perditas da ca. 30 milliuns francs. Perquai ha la regenza fatg recurs cunter questa sentenzia tar il tribunal federal svizzer, bain savend ch'il tribunal federal pudess eventualmain snegar la legitimaziun dal chantun.

Cun la sentenzia dals 5 da matg 2010 ha il tribunal federal decidì che la regenza na saja betg legitimada da far recurs. Consequentamain n'è il tribunal federal insumma betg entrà en il recurs e n'ha betg examinà ils arguments preschentads da la regenza. En quest cas n'è il tribunal federal betg s'occupà cun la sentenzia da la dretgira administrativa. La sentenzia ch'è vegnida contestada da la regenza è cun quai legalmain valaivla.

Tenor il departament da finanzas e vischnancas vali ussa da realisar l'incumbensa da fracziun da la PLD. Concretamain munta quai ch'i stoppia – en il rom da la revisiun parziala da la lescha da taglia – vegnir creada ina basa legala, per che las taglias sin l'ierta gia pajadas possian puspè vegnir pajadas enavos. Il cussegl grond vegn a tractar questa revisiun parziala en la sessiun d'october 2010.


Infurmaziuns:
- cusseglier guvernativ dr. Martin Schmid, schef dal departament da finanzas e vischnancas, tel. 081 257 32 01
- Urs Hartmann, manader da l'administraziun da taglia, tel. 081 257 33 24


Gremi: departament da finanzas e vischnancas
Funtauna: rg departament da finanzas e vischnancas