En il decurs da l'onn passà è la populaziun grischuna creschida per 0.7%. La fin da l'onn 2009 aveva il chantun 191'861 abitantas ed abitants permanents. L'augment resulta exclusivamain da l'immigraziun da persunas estras, il saldo da las naschientschas en il Grischun resta negativ. En la cumparegliaziun naziunala sa sviluppa il Grischun er vinavant sut la media.

Augment pli lev dal dumber d'abitantas e d'abitants er en il Grischun
Il dumber da las abitantas e dals abitants permanents dal chantun Grischun per ils 31 da december 2009 è cun 191'861 persunas per 0.7% pli aut che l'onn precedent (190'459); envers l'onn precedent è l'augment per 0.2 puncts procentuals pli bass. Quai resulta en emprima lingia da la conjunctura debla da l'onn 2009 e da l'immigraziun che vegn in pau retardada tras quai. Il medem svilup sa mussa er sin plaun naziunal – l'augment dal dumber da las abitantas e dals abitants importa qua l'onn 2009 anc 1.1% (2008: 1.4%).

Grondas differenzas tar il svilup regiunal
Suandond la tendenza generala dals ultims onns, è la populaziun creschida l'onn 2009 il pli fitg en las regiuns Engiadina bassa (+1.5%), Grischun dal nord (+1.2%) sco er Engiadin'ota (+1.1%); augments sur la media datti er a Tavau (+1.0%) sco er en la Mesolcina (+0.9%). Ina stagnaziun u schizunt ina reducziun sa mussa vinavant en il Grischun central (-0.1%), en Surselva (-0.4%) sco er en Val Müstair (-2.0%).

La populaziun permanenta ils 31 da december 2009 tenor regiuns

Funtauna: ESPOP 2009, UST

Midament da la populaziun permanenta l'onn 2009 (en %)

Funtauna: ESPOP 2009, UST

Puspè in saldo negativ da las naschientschas
L'onn 2009 èn vegnids registrads en il Grischun 1'619 uffants novnaschids. Envers l'onn precedent (1'597) è quai in lev augment. Perquai ch'il dumber da mortoris è creschì a medem temp per 70 sin 1'701, resulta l'onn 2009 puspè in saldo negativ da las naschientschas (-82). La fertilitad da la populaziun estra è er vinavant bler pli gronda, uschia ch'il saldo da las naschientschas d'uffants esters (+230) vegn da cumpensar per part il saldo proporziunalmain fitg negativ da la populaziun svizra (-312).

L'immigraziun dals stadis vegls da la UE cuntinuescha malgrà la crisa economica
Pervia da la recessiun ch'è stada perceptibla cunzunt l'onn passà, è er l'immigraziun da l'ester en il Grischun sa reducida levamain. Ella resta dentant sin in aut nivel. La fin da l'onn 2009 dumbra il Grischun 30'933 persunas estras cun domicil permanent (+4.4%). La bilantscha da la migraziun interchantunala resta percunter negativa per il Grischun.

Il dumber da las abitantas e dals abitants tudestgs (+8.6%) e portugais (+10.3%) è creschì er l'onn passà il pli fitg. Ensemen preschentan questas duas gruppas gia 47% da la populaziun estra permanenta. La populaziun taliana – fin avant paucs onns la gruppa da persunas estras represchentada il pli ferm en Svizra – è stagnada dal tuttafatg ils ultims onns e furma ussa la terz gronda gruppa. Sminuì il pli fitg l'onn passà è il dumber da las abitantas e dals abitants serbs (-15.4%), quai che resulta en emprima lingia da l'independenza dal Cosovo. La cohorta da quest stadi giuven cumpara per l'emprima giada en la statistica, e quai cun 272 abitantas ed abitants permanents sin la posiziun 13. Tendenzialmain è la populaziun da tut ils stadis successurs da la Jugoslavia dentant sa reducida relativamain fitg ils ultims onns.
La fin da l'onn 2009 èn tut en tut bundant 120 naziunalitads represchentadas en la populaziun permanenta dal Grischun, mo 20 gruppas han dentant passa 100 abitantas ed abitants.

Trais da quatter Grischunas e Grischuns vivan en vischnancas cun passa 1'000 abitantas ed abitants
La fin da l'onn 2009 aveva il Grischun anc 22 vischnancas cun main che 100 abitantas ed abitants, ulteriuras 91 vischnancas avevan main che 500 abitantas ed abitants. Totalmain abitavan mo anc stgars 13% da la populaziun en questas vischnancas pli pitschnas.

Var 76% da la populaziun grischuna viva gia oz en vischnancas che han passa 1'000 abitantas ed abitants. Cun las numerusas fusiuns da vischnancas, ch'èn vegnidas messas en vigur il cumenzament da l'onn 2010 e che n'èn perquai anc betg vegnidas resguardadas qua, vegnan ils pais a sa spustar anc pli ferm en direcziun da las vischnancas grondas.

Exempel: 22 vischnancas u 11.6% da tut las vischnancas han main che 100 abitantas ed abitants. En questas 22 vischnancas vivan 1'313 persunas u 0.7% da tut la populaziun dal chantun grischun.
Funtauna: ESPOP 2009, UST

Maridar è vinavant en moda
L'onn 2009 è vegnì maridà en il Grischun 949 giadas (onn precedent: 932); tantas giadas sco anc mai dapi l'onn 2000. Sco l'onn precedent èn vegnids registrads l'onn passà supplementarmain 10 partenadis registrads. Il dumber dals divorzis sa reducescha vinavant; l'onn passà èn vegnidas separadas 372 lètgs en il Grischun, quai èn 28 damain che l'onn precedent.


Infurmaziuns:
Patrick Casanova, basa da l'economia publica tar l'uffizi per economia e turissem, tel. 081 257 23 74


Gremi: uffizi per economia e turissem
Funtauna: rg uffizi per economia e turissem