La regenza grischuna ha prendì enconuschientscha da l'analisa da la consultaziun tar la nova finanziaziun dal turissem ed ha discutà la direcziun per l'ulteriura elavuraziun da quest project. Ultra da quai è ella sa fatschentada cun la realisaziun d'in nov center da cumpetenza per laina en il Puschlav.

La finamira resta ina taxa turistica
La consultaziun tar la nova finanziaziun dal turissem dal Grischun ha gì lieu dals 30 da november 2009 fin ils 31 da mars 2010. L'analisa da las respostas da la consultaziun mussa, co ch'i duai vegnir cuntanschì – cun tschertas adattaziuns – in project davart la taxa turistica che vegn sustegnì d'ina maioritad. Ina taxa turistica generala per la finanziaziun da basa d'incumbensas turisticas e dal marketing turistic è ina part centrala da la refurma dal turissem grischun, e perquai vegn ella persequitada vinavant.

Ils circuls interessads han gì temp quatter mais per sa fatschentar cun la tematica. Tar il chantun èn entradas totalmain 152 posiziuns: 7 posiziuns da partidas politicas, 5 da departaments e d'uffizis chantunals, 18 d'organisaziuns turisticas, 32 da federaziuns professiunalas e da cuminanzas d'interess, 71 da vischnancas e da corporaziuns regiunalas sco er 19 da persunas privatas e da singulas interpresas. L'analisa da las respostas da la consultaziun mussa ussa las fermezzas e las deblezzas dals dus sbozs da leschas concernent ina nova finanziaziun dal turissem ch'èn vegnids preschentads en la consultaziun. La regenza grischuna ha prendì enconuschientscha da l'analisa da la consultaziun e discutà la direcziun per l'ulteriura elavuraziun da quest project.

La refurma dal turissem grischun è incontestada
Las finamiras da la refurma currenta dal turissem èn incontestadas e lur stadi da realisaziun è renconuschì. Da las posiziuns resorta che las cundiziuns generalas per il turissem duain vegnir meglieradas vinavant en moda consequenta. Las pretensiuns per las organisaziuns per la gestiun da destinaziuns (OGD) e per las organisaziuns turisticas regiunalas (OTReg) sco er l'obligaziun da colliaziun per tut las organisaziuns turisticas duain vegnir mantegnidas. La regenza duai pudair intervegnir mo, sch'i na vegnan betg chattadas soluziuns en la regiun.

La taxa turistica sto vegnir sviluppada vinavant
Ina nova finanziaziun dal turissem vegn resguardada sco necessaria e duai er vegnir pussibilitada. Actualmain vegn examinà detagliadamain in dumber da propostas concretas per meglierar la finanziaziun dal turissem. En quest connex furman il sboz da la lescha davart la finanziaziun da las organisaziuns turisticas (LFOT) ed il sboz da la lescha davart l'armonisaziun da la finanziaziun dal turissem (LAFT) ina basa fundada per sviluppar vinavant il project da lescha. La finanziaziun dal marketing turistic e dal svilup turistic stattan vinavant en il center. La taxa turistica duai valair per tut il chantun, tar la realisaziun duai in "element communal" però survegnir in grond pais. Ulteriurs scleriments detagliads ston vegnir fatgs areguard il fond turistic planisà. L'execuziun e la retschertga da datas duain vegnir examinadas areguard lur opportunitad ed areguard lur effizienza.

Taxa turistica chantunala per tut las giudidras e per tut ils giudiders
Tut las interpresas che profitan directamain u indirectamain dal turissem duain vegnir integradas en la finanziaziun dal turissem. L'obligaziun da pajar ina taxa turistica duai vegnir examinada anc ina giada en cas d'interpresas ch'èn activas sin tut il mund e ch'èn orientadas a l'export. La midada da sistem tar las alloschadras e tar ils alloschaders (capacitad empè da frequenza) sco er l'integraziun da tut las abitaziuns da vacanzas en la finanziaziun dal turissem vegnan beneventadas da princip. La basa per fixar la taxa sco er la cunfinaziun dals differents tips d'alloschadras e d'alloschaders da la hotellaria e da la parahotellaria duain vegnir precisads e definids en moda pli clera.

Debatta en il cussegl grond durant la sessiun d'avust 2011
Tut en tut poi vegnir constatà ch'igl èn vegnidas furnidas conclusiuns che permettan d'elavurar vinavant il project. La nova concepziun da la finanziaziun dal turissem è vinavant ina part centrala da la refurma dal turissem grischun. Perquai vegn ella persequitada vinavant. il departament d'economia publica e fatgs socials e l'uffizi per economia e turissem sclereschan las dumondas giuridicas e politicas en vista ad in sboz da la lescha revedì. Il cussegl grond vegn previsiblamain a tractar questa fatschenta en sia sessiun d'avust 2011.


Il chantun empermetta da sustegnair in nov center da cumpetenza per laina en la Val Puschlav
La regenza grischuna ha da princip ina tenuta positiva envers la realisaziun d'in nov center da cumpetenza per laina en la Val Puschlav. En in'emprima posiziun è ella pronta da sustegnair il project – sut tschertas premissas – cun in emprest da 3 milliuns francs sco er cun ina contribuziun dad 1 milliun francs.
En il Puschlav duai vegnir sviluppà in center biling da furmaziun e da tecnologia d'impurtanza internaziunala, nua ch'i vegnan purschidas scolaziuns e perfecziunaments per spezialistas e per spezialists da l'economia da laina. Tras il project vegn ultra da quai promovida ina stretga collavuraziun transcunfinala cun la provinza da Sondrio e cun la regiun Lumbardia. Sut la direcziun da la regiun Valposchiavo èn participads plirs partenaris al project, tranter auter l'institut per furmaziun supplementara professiunala da la Svizra sidorientala (IFSP) che maina gia il center da furmaziun per guaud e per laina a Maiavilla.
Sin basa dals resultats d'in studi da realisabladad ch'è avant maun ha la regenza da princip ina tenuta positiva envers la realisaziun dal project. Ella è da l'avis ch'il project e che las plazzas da lavur che duain vegnir stgaffidas hajan ina gronda impurtanza per l'economia publica da la regiun Valposchiavo. Per ils custs d'investiziun dal project è la regenza pronta d'empermetter ina contribuziun à fonds perdu dad 1 milliun francs e – sin basa da la nova politica regiunala da la confederaziun (NPR) – in emprest da 3 milliuns francs. La premissa è dentant ch'ils detagls che ston anc vegnir sclerids cumprovian la realisabladad a maun d'in model da fatschenta persistent, che las gruppas participadas confermian tras contracts lur intenziuns da cooperaziun e ch'i saja vegnida fundada en moda giuridicamain lianta ina instituziun che porta l'entira responsabladad. Plinavant ston ils iniziants mussar en moda plausibla ch'il manaschi dal center da cumpetenza per laina cuvria a vista mesauna ils custs e che la finanziaziun da tut ils custs d'investiziun da var 18 milliuns francs saja garantida.


Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01


Gremi: regenza
Funtauna: rg chanzlia chantunala dal Grischun