Ensemen cun ils chantuns Berna e Vallais sco er cun la confederaziun (Innotour), ha l'uffizi per economia e turissem dal chantun Grischun laschà elavurar in mussavia davart la "Domiciliaziun da vitgs da vacanzas e da hotels". Il mussavia ch'è in agid d'orientaziun per las vischnancas, per las autoritads e per ils promoturs da turissem è ussa avant maun en furma d'in document pratic stampà.

Pussaivladads d'alloschament attractivas èn impurtantas per il Grischun sco chantun da turissem. Sin fundament dals differents basegns dals giasts han la nova furma d'alloschament "vitgs da vacanzas" e – sco ch'igl è tradiziun – vinavant er ils hotels ina impurtanza speziala.

La domiciliaziun da tals projects è pretensiusa per tut las acturas ed ils acturs. Da l'evaluaziun dal lieu fin a la construcziun ed a la gestiun ston vegnir fatgs numerus scleriments e prendidas numerusas decisiuns. In agid d'orientaziun po esser in bun sustegn en quest connex.

Ensemen cun ils chantuns Berna e Vallais, cun la confederaziun (Innotour) sco er cun spezialistas e spezialists internaziunals per vitgs da vacanzas ha l'uffizi per economia e turissem dal chantun Grischun laschà elavurar in mussavia davart la "Domiciliaziun da vitgs da vacanzas e da hotels". Il mussavia serva sco agid d'orientaziun e sco ovra da consultaziun per progredir en moda uschè segira sco pussaivel en process cumplitgads da planisaziun e da decisiun.

Il mussavia che s'orientescha a la pratica e che cumpiglia en tut 84 paginas sa drizza spezialmain a vischnancas, ad autoritads ed a promoturs da turissem ed è ussa er avant maun sco document pratic. Il mussavia po vegnir retratg tar l'uffizi per economia e turissem: tel. 081 257 23 42, e-mail: info@awt.gr.ch. Il mussavia po er vegnir chargià giu da la pagina d'internet www.awt.gr.ch sco datoteca da PDF.


Infurmaziuns:
Lorenzo Zanetti, manader dal svilup regiunal, uffizi per economia e turissem dal Grischun, tel. 081 257 30 89


Gremi: uffizi per economia e turissem
Funtauna: rg uffizi per economia e turissem