La regenza grischuna ha prendì enconuschientscha d'ina petiziun d'anteriuras collavuraturas e d'anteriurs collavuraturs da la resgia gronda Mayr-Melnhof da Domat. En sia resposta exprima ella sia enclegientscha per ils giavischs, renviescha dentant tschertas pretensiuns.
Prendì enconuschientscha da la petiziun d'anteriuras collavuraturas e d'anteriurs collavuraturs da Mayr-Melnhof
La regenza grischuna ha prendì enconuschientscha d'ina petiziun da las anteriuras collavuraturas e dals anteriurs collavuraturs da la resgia gronda Mayr-Melnhof da Domat. La petiziun è vegnida surdada a la regenza ils 27 da schaner 2011 en num da la gruppa CALST, dal collectiv da las anteriuras lavurantas e dals anteriurs lavurants da Swiss Timber. En sia resposta communitgescha la regenza al CALST ch'ella haja enclegientscha per ils giavischs e ch'ella deploreschia fitg che la Mayr-Melnhof Swiss Timber (MMST) haja stuì serrar il manaschi il december 2010 pervia da la decleraziun da concurs e che tut las 128 persunas emploiadas hajan pers pervia da quai lur lavur.
Per il pajament d'ina summa d'indemnisaziun e da satisfacziun da sis salaris mensils u da 25'000 francs per tut las anteriuras collavuraturas e per tut ils anteriurs collavuraturs, sco quai ch'i vegn pretendì en la petiziun, manca tenor la regenza dentant la basa. Ultra da quai na fiss la finanziaziun d'in plan social or dals meds finanzials da la massa da concurs legalmain betg admessa. La regenza punctuescha il medem mument ch'ella haja – cun elavurar ina cunvegna da sanaziun – fatg tut il pussaivel e duvrà tut ils meds legals permess che la stevan a disposiziun per segirar il futur da la resgia e per evitar in concurs da la MMST. Suenter la decisiun dal cussegl grond ha la MMST annunzià il concurs.
Ultra da quai renviescha la regenza al fatg che l'uffizi chantunal per industria, mastergn e lavur è stà a disposiziun a las collavuraturas pertutgadas ed als collavuraturs pertutgads cun in team a partir dal mument ch'il concurs è vegnì declerà. Supplementarmain ha il chantun er garantì che tut ils dabuns da vacanzas, che tut las sururas e che tut las pretensiuns da salari dals ultims quatter mais èn vegnids pajads en duas ratas en il rom da l'assicuranza d'insolvenza. Davart las ulteriuras pretensiuns nunpajadas decida – dapi il mument ch'il concurs è vegnì declerà – l'administraziun da concurs tenor las prescripziuns da la lescha davart la scussiun ed il concurs. Uschenavant che quai è pussaivel s'engascha il chantun en la giunta da las credituras e dals crediturs per ils giavischs da las anteriuras lavurantas e dals anteriurs lavurants.
Da vischnancas e da regiuns
- Bravuogn: La revisiun parziala da la planisaziun locala che la vischnanca da Bravuogn ha concludì ils 9 da mars 2010 en vista a la construcziun d'in indriz d'ennavar en il territori da skis vegn approvada.
Gremi: regenza
Funtauna: rg chanzlia chantunala dal Grischun