La regenza grischuna ha concludì ina revisiun da l'ordinaziun d'alpegiada sco er da l'ordinaziun davart ils fatgs veterinars. Cun questas adattaziuns po il chantun cumbatter pli intensivamain epidemias d'animals. Ultra da quai ha la regenza formulà sias posiziuns tar differents projects da consultaziun da la confederaziun.

Il cumbat cunter epidemias d'animals pretenda novas prescripziuns d'alpegiada
Il chantun Grischun adatta sias prescripziuns d'alpegiada a la situaziun actuala dal cumbat cunter epidemias d'animals. En il futur vul il chantun cumbatter pli intensivamain en spezial la zoppina da nursas. La regenza grischuna ha approvà ina revisiun parziala correspundenta da l'ordinaziun d'alpegiada e da l'ordinaziun davart ils fatgs veterinars e mess en vigur quella per il 1. d'avrigl 2011.
Fin ussa è il temp da quarantina tar l'alpegiada vegnida reglada per tut las spezias d'animals tuttina. Ella durava 20 dis. Las prescripziuns novas cumondan ussa ina quarantina da 28 dis per las nursas. Uschia sa lascha evitar tar l'effectiv d'animals da la chargiada ina derasaziun da la zoppina da nursas che ha in temp d'infecziun da 28 dis. Medemamain na ston en l'avegnir betg mo las nursas ch'èn stadas chargiadas sin alps communablas u sin pastgiras communablas esser libras da la zoppina, mabain tut ils animals che vegnan tegnids durant la stad en il chantun. Per evitar ina nova infecziun duain uschia da nov er nursas che vegnan tegnidas en manaschis privats a chasa vegnir tractadas cunter la malsogna. La zoppina da nursas è ina malsogna d'unglas fitg derasada che vegn chaschunada tras agents bacterials.
En l'ordinaziun d'alpegiada adattada valan ultra da quai er novas prescripziuns en il cumbat cunter la tschorvadad da chamutschs. Uschia sto il cumenzament da questa malsogna durant l'alpegiada vegnir annunzià a l'uffizi per la segirezza da victualias e per la sanadad d'animals. Ultra da quai ston vegnir prendidas – en enclegientscha cun l'uffizi – mesiras da cumbat tras la possessura u tras il possessur d'animals. Cun questa nova obligaziun d'annunzia po l'uffizi bainspert introducir mesiras ch'impedeschan la derasaziun da la malsogna sin animals selvadis sco chamutschs e capricorns.

La regenza s'exprima a favur da l'obligaziun da dar infurmaziuns tar retschertgas statisticas da la confederaziun
La regenza grischuna refusa l'iniziativa parlamentara "Nagin schlargiament da l'obligaziun da dar infurmaziuns tar retschertgas statisticas da la confederaziun". En la resposta da consultaziun s'exprima la regenza per la regulaziun vertenta da l'obligaziun da dar infurmaziuns.
La regulaziun vertenta en la lescha federala davart la statistica federala prevesa ch'il cussegl federal possia ordinar in'obligaziun da dar infurmaziuns tar ina retschertga, sche quella vegn duvrada indispensablamain per la cumplettadad, per la represchentativitad, per la cumparegliabladad u per l'actualitad d'ina statistica. L'iniziativa parlamentara pretenda dentant che l'obligaziun da dar infurmaziuns duess valair mo tar la dumbraziun dal pievel. La participaziun ad autras retschertgas, en spezial a l'enquista svizra davart la populaziun activa, fiss alura facultativa.
Tenor l'avis da la regenza porta dentant gist quella retschertga infurmaziuns impurtantas p.ex. tar il svilup da l'occupaziun, tar las cundiziuns da lavur u tar las consequenzas da la libra circulaziun. L'experientscha mussa er ch'il dumber da persunas che refusan las dumondas sa sbassa automaticamain e marcantamain tar in'obligaziun da dar infurmaziuns. Tenor l'avis da la regenza sa giustifitgescha in'obligaziun da dar infurmaziuns pia. Plinavant èn las determinaziuns per la protecziun da datas tar retschertgas statisticas sin plaun naziunal fitg strictas ed er la protecziun da la sfera privata è garantida. La finala renda la regenza attenta a las autas pretensiuns metodicas da las retschertgas statisticas publicas che sa differenzieschan da las retschertgas e da las enquistas privatas che daventan adina pli numerusas.

Las propostas da la confederaziun tar la refurma da las structuras da la prevenziun professiunala vegnan refusadas
La regenza grischuna refusa las propostas da la confederaziun tar la refurma da las structuras da la prevenziun professiunala. En sia resposta da consultaziun refusa ella la midada da l'ordinaziun e pretenda da repassar il project e da purifitgar quel.
Cun differentas midadas d'obligaziuns vul la confederaziun rinforzar la surveglianza en il sectur da la prevenziun professiunala. Uschia duai tranter auter vegnir creada ina cumissiun da surveglianza suprema. Plinavant duain ulteriuras disposiziuns da governance schlargiar la transparenza tar l'administraziun da las cassas da pensiun.
Tenor l'avis da la regenza emprova la confederaziun da puspè gudagnar la confidenza persa en la segunda pitga, e quai cun la revisiun qua avant maun cun ina surreglamentaziun sin il stgalim d'ina ordinaziun. Cun la via proponida cuntanscha ella dentant il cuntrari. Las prescripziuns novas èn inutilmain cumplitgadas e degenerantas. Ellas na portan naginas meglieraziuns evidentas, augmentan dentant considerablamain ils custs d'administraziun da las instituziuns da prevenziun. Tenor la regenza vali da rinforzar la segunda pitga che sa basa sin in partenadi social ed en spezial l'organ paritetic sco organ suprem da las instituziuns da prevenziun. Questa pretensiun na po il project da revisiun dentant cleramain betg ademplir.

La midada da la lescha da bursas vegn beneventada
La regenza grischuna sustegna l'adattaziun da la lescha da bursas planisada da la confederaziun che prevesa d'abolir las premias da controlla. Sco che la regenza scriva en sia resposta da consultaziun è ella da l'avis che talas premias da controlla na sajan betg pli giustifitgads tar la surpigliada da societads.
Sch'ina acziunaria u in acziunari cumpra almain in terz dals dretgs da votar d'ina fatschenta quotada a la bursa, sto l'acziunaria u l'acziunari far in'offerta publica per la cumpra da tut las ulteriuras aczias. En quest connex po il pretsch d'offerta public esser pli bass ch'il pretsch d'aczias ch'è vegnì fixà avant cun las acziunarias principalas e cun ils acziunaris principals. Questa uschenumnada premia da controlla duai vegnir abolida tenor la proposta da la confederaziun, perquai ch'ella cuntrafa al princip dal tractament egual da las acziunarias e dals acziunaris e perquai ch'ella è nunusitada en cumparegliaziun europeica. La regenza va d'accord cun questa valitaziun. Per ella sto il tractament egual da las acziunarias e dals acziunaris vegnir valità pli aut che la restricziun da la libertad contractuala.

Da vischnancas e da regiuns 

• Mesolcina e Calanca: A las corporaziuns regiunalas "Regione Mesolcina" ed "Organizzazione Regionale della Calanca" vegn garantida – per la perioda 2011 fin 2015 – ina contribuziun totala da maximalmain 369'000 francs en il rom da la nova politica regiunala da la confederaziun (NPR) per il manaschament regiunal.
• Giuvaulta: Il project da la vischnanca da Giuvaulta per la revitalisaziun da l'aual da Giuvaulta vegn approvà e sustegnì cun ina contribuziun dad 187'000 francs.
• Samedan: A la vischnanca da Samedan vegn concedida ina contribuziun da maximalmain 120'000 francs per las lavurs finalas da la revitalisaziun da la regiun umida Cristansains.

 

Contribuziuns chantunalas a differentas instituziuns 

• Engiadina Scuol Samignun Val Müstair turissem SA: A la Engiadina Scuol Samignun Val Müstair turissem SA vegn garantida ina contribuziun chantunala da 900'000 francs per la realisaziun dal plan da business da la OGD Engiadina Scuol Samignun.

 

Gremi: regenza
Funtauna: rg chanzlia chantunala dal Grischun