Tar las preparativas per la stagiun da pestga tutga er la retratga da la patenta da pestga. Per pudair retrair la patenta per in onn u ina patenta mensila ston ins cumprovar ch'ins haja enconuschientschas da la pestga (attest obligatoric SaNa). Per quest intent vegnan purschids il mument en differents lieus dal chantun Grischun curs da scolaziun.

Tut las patentas da pestga vegnan retratgas sco fin ussa tar il museum da la natira dal Grischun a Cuira sco er tar la surveglianza da pestga. Las uras d'avertura dal spurtegl dal museum da la natira dal Grischun a Cuira èn: mardi fin sonda, mintgamai da las 10.00 fin las 17.00.

Al spurtegl dal museum da la natira dal Grischun a Cuira ed en ils districts da pestga 3 (Landquart, Landwasser, Alvra), 4 (En, Maira), 5 (En, Rom) e 6 (Poschiavino) èsi er pussaivel da da pajar cun MaestroCard u cun PostCard (naginas cartas da credit).

En il fegl uffizial dal chantun Grischun dals 24 da mars 2011 e sin la pagina d'internet da l'uffizi da chatscha e pestga www.jagd-fischerei.gr.ch èn publitgadas per ils singuls districts da pestga ils lieus, ils termins sco er las premissas per pudair retrair ina patenta. Sche terzas persunas vulan retrair patentas per persunas cun domicil en il chantun Grischun, ston ellas preschentar in attest da domicil persunal da questas persunas. Formulars correspundents pon vegnir chargiads giu da la pagina d'internet da l'uffizi da chatscha e pestga. En cas ch'ina persuna fa ina dumonda en scrit per retrair ina patenta, sto ella medemamain agiuntar in attest da domicil.

Buna pestga!


Gremi: uffizi da chatscha e pestga
Funtauna: rg uffizi da chatscha e pestga