La regenza grischuna ha approvà il concept "Retica 30" da la Viafier retica. Cun quai sustegna ella l'introducziun planisada dal tact da mes'ura da la VR che duai vegnir realisà en etappas a partir dal december 2014.

La regenza approvescha il concept "Retica 30" da la VR
Il chantun Grischun sustegna l'introducziun d'in tact da mes'ura per las lingias principalas da la Viafier retica (VR) ch'è previsa en etappas a partir dal december 2014. La regenza grischuna ha prendì enconuschientscha cun consentiment dal concept "Retica 30" ch'è vegnì inoltrà da la VR. A medem temp ha la regenza incumbensà la VR da preparar la realisaziun da quest concept e d'inoltrar a temp las dumondas necessarias per l'acquisiziun da vehichels e per la renovaziun da l'infrastructura.
La dumonda d'approvar il nov concept da purschida "Retica 30" che la VR ha drizzà a l'uffizi federal da traffic ed al chantun Grischun prevesa da garantir – a partir dal december 2014 – la colliaziun directa dals trens da las VFF che arrivan mintga mes'ura a Landquart ed a Cuira. Gia a partir da quest mument vul la VR manar novs trens da Landquart a San Murezzan via Veraina/Zernez. Uschia resulta ina clera reducziun dal temp da viadi per l'Engiadina e mintga mes'ura ina purschida alternanta via l'Alvra u via il Veraina cun colliaziun a las VFF a Landquart u a Cuira. A medem temp duai vegnir installada sin las lingias principalas da la VR Landquart-Tavau e Cuira-Glion ina purschida nova da mes'ura. Per etappas futuras d'engrondiment ha la VR er en mira ina introducziun da colliaziuns da mes'ura entaifer il Grischun per las lingias da l'Engiadina e d'Arosa, e quai almain durant il temp stagiunal sco er durant il temp da grond traffic durant il di. Tenor il concept duai la purschida vegnir engrondida cuntinuadamain, uschia ch'il tact da mes'ura duai esser introducì per l'entir di sco stadi da finamira sin la gronda part da la rait da la VR fin ils onns 2025-2030.
La regenza è da l'avis che quest pass fitg impurtant per il svilup dal traffic public dal chantun Grischun duaja vegnir promovì cun preferenza cunzunt areguard la planisaziun ed areguard la finanziaziun da las investiziuns en l'infrastructura sco er en ils vehichels che la VR dovra. Cun trens e cun bus presta il traffic public ina contribuziun impurtanta a la qualitad dal Grischun. Per satisfar meglier als basegns da las passagieras e dals passagiers durant il traffic da temp liber e durant il traffic pendular è la VR dependenta da l'engrondiment da la purschida. En il fratemp è il tact da mes'ura en ils blers territoris da la Svizra standard sin las lingias principalas. Il Grischun n'è betg mo ina da las paucas excepziuns entaifer la regiun, mabain er en direcziun da Turitg, da Son Gagl e da Bellinzona.

Contribuziuns chantunalas a differentas instituziuns 

• Flem Laax Falera management SA: A la Flem Laax Falera management SA ch'è anc en fundaziun vegn garantida ina contribuziun chantunala dad 1'000'000 francs per la furmaziun da la OGD Flem Laax respectivamain per realisar il model d'interpresa.
• Tgira da monuments: Per l'etappa da restauraziun 2010 da la claustra Son Jon a Müstair vegn pajada ina contribuziun maximala da 263'000 francs.

Projects da vias
La regenza ha approvà totalmain 6'160'000 francs per construir e per sanar ils suandants trajects da vias:
- via da l'Alvra: lavurs d'impressari e da cuvrida, Tranter ils Craps e Punt Ota
- via sursilvana: lavurs da cuvrida, Schluein – access da Rueun
- via dal Scanvetg: lavurs d'impressari, punt dal Gründjitobel
- via da Surin: lavurs d'impressari, Tumbas – punt dal Glogn
- via da Surrein: lavurs d'impressari, Plaun da Punt


Gremi: regenza
Funtauna: rg chanzlia chantunala dal Grischun