Il chantun Grischun sto adattar a las novas prescripziuns da la confederaziun il tractament da premias da las cassas da malsauns betg pajadas sco er la concessiun da la reducziun da las premias. La regenza grischuna ha deliberà la missiva correspundenta tar la revisiun parziala da la lescha davart l'assicuranza da malsauns e la reducziun da las premias. Il cussegl grond vegn a tractar questa fatschenta en la sessiun da zercladur 2011.

Perquai che adina dapli persunas assicuradas na pajan betg lur premias han las chombras federalas concludì il mars 2010 da midar la lescha federala davart l'assicuranza da malsauns e da reglar da nov il tractament da las premias betg pajadas. Il medem mument è er vegnida midada la concessiun da la reducziun da las premias. Uschia prescriva la confederaziun als chantuns da pajar la reducziun da las premias stringentamain a la cassa da malsauns e betg pli a las persunas assicuradas. Quai duai garantir che las contribuziuns dal chantun vegnian duvradas effectivamain per reducir las premias da las persunas che han il dretg da survegnir questas reducziuns. La midada da la lescha federala davart l'assicuranza da malsauns duai entrar en vigur per il 1. da schaner 2012.

Pauca libertad d'agir per adattar las leschas chantunalas a las prescripziuns federalas
Pervia da questas novas prescripziuns da la confederaziun sto il chantun adattar sia lescha davart l'assicuranza da malsauns e la reducziun da las premias. La libertad d'agir dal chantun è pitschna en quest connex, sco che la regenza punctuescha en sia missiva al cussegl grond. La revisiun parziala da la lescha chantunala prevesa che l'institut d'assicuranza sociala vegn designà en il futur sco autoritad chantunala cumpetenta per tractar dumondas da premias betg pajadas e dumondas da la participaziun als custs. L'obligaziun da las vischnancas ch'exista actualmain da surpigliar las premias betg pajadas e las parts dals custs vegn abolida. Empè da quai surpiglia il chantun – sco quai ch'i vegn prescrit dal dretg federal – la part da las pretensiuns che chaschunan l'emissiun d'in attest da perdita u d'in titel sumegliant. Quai vegn a custar al chantun approximativamain 2 fin 3 milliuns francs dapli per onn. Percunter vegnan las vischnancas distgargiadas correspundentamain.

Cun la nova regulaziun autorisescha il dretg federal ils chantuns da registrar sin ina glista las persunas assicuradas che n'adempleschan betg lur obligaziun da pajar la premia, malgrà ch'ellas èn vegnidas stumadas, e da permetter a las furnituras ed als furniturs da prestaziuns da prender invista da questa glista. Sin in renviament correspundent da vart dal chantun han las assicuranzas da sistir da surpigliar ils custs da prestaziuns cun excepziun da tractaments urgents. Cun questa glista sa lascha impedir che questas persunas assicuradas possian profitar da tractaments medicinals sin donn e cust dal maun public. En sia missiva propona la regenza al cussegl grond da far diever da questa autorisaziun.

Dapli custs e dapli lavur
La finala prescriva il dretg federal da nov che las reducziuns da las premias stoppian vegnir pajadas en il futur stringentamain a las assicuranzas e betg pli a las persunas assicuradas. Quai n'ha però nagina influenza directa sin ils dretgs da las persunas assicuradas. Perquai ch'il nov modus da pajament sto probablamain – sin basa da las prescripziuns federalas – vegnir fatg cun agid d'in barat da datas automatisà per gronda part e perquai che circa 5 fin 15 pertschient da las persunas assicuradas che avessan il dretg da survegnir ina reducziun da las premias n'han enfin ussa betg profità da quest dretg, sto il chantun far quint da stuair surpigliar dapli contribuziuns. Perquai stoi vegnir fatg quint cun custs supplementars da 5 milliuns francs per onn.

Il nov modus da pajar las reducziuns da las premias pretenda ultra da quai considerablamain dapli lavur administrativa cumpareglià cun il sistem actual. Perquai vegnan er ils custs da realisaziun ch'il chantun sto surpigliar a s'augmentar considerablamain. Tut en tut sto il chantun far quint cun custs supplementars da 7 fin 9 milliuns francs per onn.

La midada dal modus da pajar la reducziun da las premias a las assicuranzas e betg pli a las persunas assicuradas ston ils chantuns realisar entaifer dus onns suenter l'entrada en vigur da la midada dal dretg federal. La regenza ha l'intenziun da far questa midada, uschespert ch'igl è tecnicamain pussaivel da far quests pajaments a las assicuranzas.


Infurmaziuns:
Gion-Claudio Candinas, secretari dal departament, departament da giustia, segirezza e sanadad, tel. 081 257 25 12


Gremi: regenza
Funtauna: rg chanzlia chantunala dal Grischun