L'agroturissem duai vegnir rinforzà en il chantun Grischun. La regenza grischuna ha prendì enconuschientscha d'in rapport strategic correspundent ed ha instradà la realisaziun da quel. Ultra da quai ha la regenza deliberà sias posiziuns tar consultaziuns da la confederaziun.

Il Grischun vul rinforzar l'agroturissem
La regenza grischuna vul rinforzar l'agroturissem en il Grischun. Ella ha prendì enconuschientscha d'in rapport strategic ch'ella aveva incumbensà al post spezialisà per turissem e svilup persistent a Vargistagn. L'analisa mussa ch'i dat in grond potenzial per l'agroturissem en il chantun Grischun. Partind da questa constataziun èn vegnidas formuladas ina visiun sco er finamiras e mesiras. Ins emprova da sustegnair professiunalmain las exponentas ed ils exponents, ins vul cuntanscher ina furma d'organisaziun optimala ed ina meglra commerzialisaziun da las purschidas da l'agroturissem d'auta qualitad. Quai duai purtar dapli valurisaziun al Grischun e promover en general il svilup persistent en las regiuns.
Per realisar las mesiras èsi vegnì publitgà la constituziun ed il manaschi d'ina agentura per agroturissem. L'incarica per il mandat ha il chantun surdà a la "ARGE Pluswert ScRL/ ProzessPiraten ScRL" da Cuira. Questa agentura coordinescha en il futur sin plaun operativ l'agroturissem dal Grischun ed è pia cumpetenta per la concepziun, per il manaschi e per l'ulteriur svilup da l'agroturissem en il Grischun. Ella fa da scharnier tranter l'agricultura ed il turissem. L'organisaziun per l'agroturissem dal Grischun duai tgirar tut ils secturs agroturistics sco per exempel las pernottaziuns, la gastronomia, la vendita directa e las purschidas d'aventura e duai coordinar lur commerzialisaziun. Per realisar la strategia "agroturissem dal Grischun" en ils onns 2011 fin 2014 ha la regenza permess in plafonament dals custs dad 1'380'000 francs.

La midada da la lescha federala da narcotics ch'è vegnida proponida vegn refusada
La regenza grischuna refusa la midada previsa da la lescha federala da narcotics. Cun l'adattaziun che sa basa sin ina iniziativa parlamentara propona la cumissiun per segirezza sociala e sanadad dal cussegl naziunal ch'il consum da cannabis tar persunas creschidas e tar giuvenils sur 16 onns possia vegnir chastià en il futur en la procedura da multas disciplinaras.
En sia resposta da consultaziun supplitgescha la regenza la confederaziun da desister dal project. Il scumond da consum duai vegnir registrà er vinavant tras ina denunzia poliziala e chastià tras la procura publica e tras las dretgiras. Cunter la nova proposta pledan – tenor la regenza – quitads areguard la protecziun da la sanadad, la protecziun da la giuventetgna e la segirezza dal traffic sco er la tema che cun bagatellisar pudess ir a perder l'effect starmentant. Or da vista da la polizia investiganta duessi vegnir desistì dal reschim vertent da sancziuns, perquai che ina suletta procedura da multas disciplinaras vegniss tschiffass giu l'investigaziun en vista al commerzi.

L'extensiun dal scumond d'exercitar ina professiun vegn da princip beneventada
La regenza grischuna sustegna da princip l'extensiun dal scumond d'exercitar ina professiun sco ch'el vegn previs da la confederaziun. Per proteger meglier persunas minorennas sco er persunas ch'èn fermamain malsaunas u fitg attempadas cunter delinquents respectivs prechastiads duai vegnir extendì il scumond existent dal dretg penal d'exercitar ina professiun e duai vegnir cumplettà cun in scumond d'areal. Quests scumonds duain vegnir realisads grazia ad in extract extendì dal register penal. Per quest intent dovri ina midada da la constituziun federala, dal cudesch penal svizzer, da la lescha penala militara e dal dretg penal per giuvenils.
Sco che la regenza constatescha en sia resposta da consultaziun, beneventa ella bain la finamira dal project, dentant resultan differentas dumondas per la realisaziun sin plaun chantunal. Per l'ina ston vegnir amplifitgadas las capacitads da l'assistenza da reabilitaziun per pudair garantir il concept da surveglianza. Ultra dals custs supplementars persunals ston vegnir menziunads er ils custs per l'infrastructura tecnica. Perquai sa tschenta la dumonda, sche per concordat d'execuziun da chastis vegn a stuair vegnir endrizzà in post central che fa l'installaziun tecnica e la surveglianza.
Ultra da quai renviescha la regenza al fatg che er l'obligaziun da dumandar in extract dal register penal na garantescha betg ina segirezza cumpletta, perquai che persunas che daventan delinquentas per l'emprima giada na pon betg vegnir enconuschidas da quel. Medemamain constatescha la regenza ch'in extract amplifitgà obligatoric dal register penal chaschunass per exempel per organisaziuns en uffizi d'onur custs supplementars che fissan strusch da dumagnar e che na stessan eventualmain betg en relaziun cun il niz.

Da vischnancas e da regiuns 

• Lumbrein: La revisiun parziala da la constituziun communala da la vischnanca da Lumbrein, concludida da la radunanza communala ils 23 da favrer 2011, vegn approvada.

 
Contribuziuns chantunalas a differentas instituziuns 

• Project collectiv "reparaziun d'ovras da protecziun 2011": La regenza approva il project "reparaziun d'ovras da protecziun 2011", in project collectiv da differentas vischnancas. Als custs vegnan garantidas contribuziuns da totalmain 7'003'900 francs. L'object dal project collectiv èn 36 objects da reparaziun che sa repartan sin 20 patrunas e patruns da construcziun.
• Rempars da lavinas Malögia: Il project "cumplettaziun dals rempars da lavinas Malögia, via da Malögia", traject da la via chantunala Malögia – Casaccia, sin il territori da la vischnanca da Bregaglia vegn approvà. Als custs vegn garantida ina contribuziun da maximalmain 258'750 francs.
• Rempars Alp Grüm: Il project "reparaziun e cumplettaziun dals rempars Alp Grüm (etappa 3)" da la Viafier retica sin il territori da la vischnanca da Puschlav vegn approvà e sustegnì cun ina contribuziun da maximalmain 431'250 francs.
• Protecziun cunter crudada da crappa God da las Chasettas: Il project "protecziun cunter crudada da crappa God da las Chasettas", traject da la via chantunala Zernez – Punt la Drossa vegn approvà. Als custs vegn garantida ina contribuziun da maximalmain 727'500 francs.
• Internat da scola a Flem: Il project per sanar ils locals sanitars en l'internat da scola a Flem da la fundaziun "Zürcher Kinder- und Jugendheime" vegn approvà e sustegnì cun ina contribuziun chantunala da maximalmain 94'000 francs.

Projects da vias
La regenza ha approvà totalmain 1'863'000 francs per construir e per sanar il suandant traject da via:
- via dal Güglia: lavurs da cuvrida, Mot – Sur Gonda


Gremi: regenza
Funtauna: rg chanzlia chantunala dal Grischun