La cumissiun dal cussegl grond per economia e taxas ha cumenzà cun la deliberaziun da la lescha davart las taxas turisticas (LTT). Ella entra en la fatschenta, returnond il medem mument il project a la regenza per al repassar.

L'acquisiziun dals giasts, las occurrenzas, ils indrizs turistics e l'infurmaziun dals giasts al lieu vegnan finanziads oz en il chantun Grischun tras taxas da cura e tras taxas per promover il turissem. Cun la missiva tar las taxas turisticas propona la regenza grischuna da prender cumià da quest sistem e d'introducir ina finanziaziun dal turissem chantunala e confurma al martgà tras tuts che profitan dal turissem. La cumissiun per economia e taxas ha ussa cumenzà – sut il presidi da deputà Heinz Dudli ed en preschientscha da cusseglier guvernativ Hansjörg Trachsel – cun la predeliberaziun da la missiva da la regenza. Il tractament da questa fatschenta en il cussegl grond era previs per la sessiun d'avust. Suenter duas sesidas intensivas è la cumissiun entrada en il project, però mo per al returnar a la regenza per al repassar.
 
Pervia da las reacziuns da differentas regiuns turisticas ha la cumissiun constatà che la grevezza fiscala en il sectur dals hotels da quatter e da tschintg stailas è per part marcantamain pli gronda cun il sistem da taxas nov che cun il sistem vertent. Differentas uniuns da hotelieras e da hoteliers da regiuns turisticas impurtantas refusan perquai la LTT. Pervia da quai spetga la cumissiun che la regenza examineschia las resalvas correspundentas ed adattia ils parameters da calculaziun.
 
Plinavant duai vegnir examinà, sche las vischnancas pon vegnir autorisadas da pajar ils meds per las organisaziuns turisticas or da meds fiscals generals u sch'ellas pon relaschar ina taxa turistica sin basa da la LTT. La cumissiun spetga da quai ina simplificaziun da la legislaziun.
 
Ultra da quai giavischa la cumissiun ina descripziun pli precisa dals subjects ch'èn obligads da pajar la taxa e, nua ch'il stadi stat cun ses servetschs en concurrenza cun purschiders privats, stoi vegnir examinà, sche quai sa cumporta cun il princip dal tractament egual.

Per pussibilitar in'execuziun simpla ston las reglas da la lescha vegnir examinadas en general, sch'ellas èn applitgablas en moda simpla. Intschertezzas concernent il subject ch'è obligà da pajar la taxa e concernent l'object suttamess a la taxa ston – sche pussaivel – vegnir eliminadas gia en la lescha.
 
Cun questa decisiun d'entrar en la materia ha la cumissiun predeliberanta dal cussegl grond cumprovà ch'il chantun Grischun dovra ina midada da sistem tar la finanziaziun dal turissem. La regenza ha ussa la pussaivladad da persequitar vinavant la via tschernida e d'examinar e d'adattar il project confurm a las respostas da la cumissiun predeliberanta. La finamira resta quella da rinforzar il turissem en il Grischun e d'attrair dapli giasts en il chantun, perquai che in punct è incontestà tar tuts: Il turissem è impurtant, e quai gist per la populaziun decentralisada da noss chantun.
 
Cur ch'il cussegl grond vegn a tractar la lescha davart las taxas turisticas è anc avert per il mument. Avant che la lescha vegn tractada en il parlament, vegn la cumissiun per economia e taxas a sa fatschentar anc ina giada detagliadamain cun il project.


Infurmaziuns:
Heinz Dudli, president da la cumissiun, tel. 079 248 46 47


Gremi: cumissiun per economia e taxas
Funtauna: rg cumissiun per economia e taxas