Il chantun Grischun vul reglar da nov sias prescripziuns per las publicaziuns uffizialas e resumar quellas en in'unica lescha. La regenza grischuna ha deliberà la missiva correspundenta per il relasch d'ina nova lescha da publicaziun. Il cussegl grond vegn a tractar questa fatschenta en la sessiun d'october.

Per sias publicaziuns uffizialas, sco las collecziuns da leschas ed il fegl uffizial, enconuscha il chantun Grischun oz mo prescripziuns plitost rudimentaras. Quai ha er gia chaschunà problems en il passà. Igl è perquai necessari da resumar las differentas ordinaziuns existentas en ina nova lescha confurm al stgalim.

La nova lescha davart las collecziuns da leschas e davart il fegl uffizial (lescha da publicaziun), che vegn proponida da la regenza, duai cuntegnair in pèr paucas prescripziuns impurtantas. Questas prescripziuns sa restrenschan als organs da publicaziun ed a lur cuntegn, als geners da publicaziun per publicaziuns ordinarias ed extraordinarias, a la lingua da publicaziun, als effects giuridics da las publicaziuns sco er a las furmas da cumpariziun da las publicaziuns. Tar ils organs da publicaziun uffizials dal chantun tutgan il cudesch da dretg grischun (collecziun sistematica da leschas), la collecziun uffiziala da leschas (collecziun cronologica da leschas) sco er il fegl uffizial dal chantun.

A medem temp è la nova lescha la basa per pudair desister en l'avegnir d'edir il cudesch da dretg grischun en furma stampada. A partir da l'onn 2012 duai il cudesch da dretg grischun cumparair mo pli en furma electronica. Quest pass s'impona, perquai ch'il dumber d'abunentas e d'abunents da la versiun stampada è sa reducì fermamain. Cunquai che la versiun stampada vegn actualisada mo mintga mez onn, consulteschan las persunas interessadas oz per gronda part il cudesch da dretg en l'internet. La versiun electronica vegn actualisada tut tenor il basegn mintga di sut www.gr-lex.gr.ch e po vegnir consultada e stampada en il format da PDF. Tras questa tendenza generala vegn la dumonda da publitgar il cudesch da dretg mo pli en furma electronica discutada pli e pli savens er en auters chantuns.

Betg en il center stattan, ma er da resguardar èn ils custs che pon vegnir spargnads, sch'i vegn desistì da producir la versiun stampada dal cudesch da dretg grischun. Ils custs per l'actualisaziun importan circa 80'000 francs per onn. Il chantun spargnass ulteriurs custs da circa 100'000 francs, sch'el pudess desister da la restampa integrala che daventa necessaria il proxim temp.


Infurmaziuns:
president da la regenza dr. Martin Schmid, schef dal departament da finanzas e vischnancas, tel. 081 257 32 01


Gremi: regenza
Funtauna: rg chanzlia chantunala dal Grischun