Las vias da la Lumnezia e da Val S. Pieder duain vegnir colliadas directamain cun la via sursilvana tras in sviament al vest da Glion. Uschia po il center da la citad vegnir distgargià en moda efficazia dal traffic da transit en direcziun da Sursaissa, da la Lumnezia e da Val S. Pieder. Il project reelavurà dal sviament è exponì publicamain fin ils 22 da settember 2011 en la citad da Glion. Per construir il project da circa 26 milliuns francs vegni fatg quint cun 4 fin 5 onns.

Glion, ed uschia er las vals lateralas da la vart dretga dal Rain, èn colliadas fin ussa cun la rait da vias surordinada mo sur la punt dal Rain. Perquai che la lingia da la Viafier retica cruscha l'access a la punt, resultan qua regularmain colonnas pli lungas pervia dals numerus trens che passan. En consequenza da quai era vegnì exponì publicamain l'onn 2002 il project d'in sviament al vest da Glion. Il project ha dentant fatg naufragi pervia d'in recurs tar la dretgira administrativa. Sin basa da la sentenzia respectiva sto vegnir mantegnì l'uschenumnà tschaler da biera sper la via da la Lumnezia a l'ur da Glion, e quai ha gì ina influenza sin il trassé dal sviament planisà. Il project dal sviament, ch'è vegnì reelavurà e midà en differents puncts, è ussa exponì publicamain fin ils 22 da settember 2011 en la citad da Glion e tar il chantun.

En general correspundan ils trassés da las vias pertutgadas al project d'exposiziun da l'onn 2002. Sco midadas principalas èsi da menziunar ch'il tschaler da biera vegn mantegnì sco er che la Via Sogn Martin e la Via Santeri vegnan colliadas cun la via da la Lumnezia tras ina rundella. Tras il sviament – cun las colliaziuns a las vias da la citad ed a las vias da colliaziun da las vals lateralas da la vart dretga dal Rain – vegnan il center da la citad da Glion, differents quartiers ed en spezial ils territoris da Spaniu e da Gravas distgargiads essenzialmain dal traffic da transit.

Da la vart sanestra dal Rain vegn la via da la Lumnezia colliada cun la via sursilvana tras ina rundella. Il nord da Glion sco er las vias da colliaziun da Ladir e da Ruschein vegnan colliads cun la via sursilvana sur la Via Crappa Grossa ensemen cun il quartier da Grüneck. En consequenza da quai vegn l'access da Glion vest abolì. Il trassé da la via sursilvana vegn renovà resp. construì da nov sin ina lunghezza da circa 790 meters en il territori da la rundella da Glion vest. La ladezza dals vials da las vias d'access vegn adattada a la nova funcziun ed importa 6 meters.

La punt d'ina lunghezza da 270 meters tranter la rundella da Glion vest e l'implant da protecziun civila na traversa betg mo il Rain anteriur, mabain er il territori industrial California, la Viafier retica e la Via Santeri. Mirs da balustrada protegian cunter crudadas ed impedeschan a medem temp che la canera sa derasia en l'abitadi vischin a l'ost. Al sidost da l'implant da protecziun civila vegn realisada la nova rundella da la via da la Lumnezia. Là vegnan la Via Sogn Martin, l'access al territori industrial resp. a la Via Santeri e la via veglia da Flond colliads cun la via da la Lumnezia. Il traffic, e cunzunt er il traffic pesant en ed or da Val S. Pieder, vegn manà da nov sur la Via Sogn Martin a la via sursilvana ed en il territori industrial.

Ils custs totals vegnan calculads cun circa 26 milliuns francs. I vegn fatg quint cun in temp da construcziun da 4 fin 5 onns.


Agiunta:
Il project dal sviament.


Infurmaziuns:
- Peter Stirnimann, uffizi da construcziun bassa dal Grischun, lavur da publicitad, 081 257 37 11
- Roger Stäubli, uffizi da construcziun bassa dal Grischun, schef da la construcziun da vias, tel. 081 257 38 42


Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun