Il departament da finanzas e vischnancas trametta en consultaziun ina revisiun parziala da la lescha da taglia. En il center stat la midada da la taglia sin il relasch ad ina taglia sin la part d'ierta. Quai ha per consequenza ch'i dat ina simplificaziun administrativa per las burgaisas ed ils burgais. I duai er vegnir creada la basa legala per pudair inoltrar la decleraziun da taglia sin via electronica sco er per pudair spedir il quint e la decisiun da taxaziun sin via electronica. Ultra da quai vegnan fatgas differentas adattaziuns al dretg federal.

Taglias sin l'ierta pon vegnir concepidas sco taglias sin il relasch (l'entira ierta vegn suttamessa a la taglia sco unitad) u sco taglias sin la part d'ierta (quella part da la facultad relaschada che pertutga la singula ertavla u il singul ertavel vegn suttamessa a la taglia). Oz incassescha il chantun ina taglia sin il relasch, entant che las vischnancas enconuschan ina taglia sin la part d'ierta. Per la burgaisa e per il burgais èsi grev da chapir questa regulaziun differenta. La midada ch'ins vul cuntanscher ha per consequenza ch'i dat ina simplificaziun administrativa dal sistem fiscal e quai serva er a la segirezza giuridica.

Suenter ch'il chantun ha midà a la taglia sin la part d'ierta duain tant l'imposiziun sco er la prelevaziun da la taglia communala sin la part d'ierta vegnir delegadas a l'administraziun chantunala da taglia. L'execuziun da las medemas taglias tras il chantun e tras las vischnancas na fiss betg raschunaivla, ni dal punct da vista material ni dal punct da vista administrativ ed economic.

Binaris per l'avegnir
La revisiun parziala eliminescha ultra da quai tschertas malsegirezzas giuridicas e metta ils binaris per l'avegnir. Uschia vegn creada la basa legala per inoltrar la decleraziun da taglia sin via electronica sco er per spedir il quint e la decisiun da taxaziun sin via electronica. Ultra da quai duai il cussegl grond pudair esser liber da fixar ils pes da taglia da las persunas natiralas e da las persunas giuridicas. La differenza maximala da 10 puncts procentuals tranter il pe da taglia da las persunas natiralas e quel da las persunas giuridicas duai vegnir abolida. Uschia vegn creada la premissa per mantegnair er en il futur l'attractivitad dal Grischun sco lieu d'interpresas.

Questa revisiun parziala realisescha la finala er nov dretg federal. Il dretg federal prescriva ch'il sold per ils pumpiers da milissa saja liber da taglias. En il Grischun vala quai gia tenor il dretg vertent. Ils chantuns ston fixar ina limita superiura per il sold liber da taglias. Sco tar la confederaziun duai quest cunfin importar er per la taglia chantunala 5'000.– francs.

Il termin da consultaziun dura fin ils 9 da december 2011. La discussiun en il cussegl grond è previsa per la sessiun d'avust 2012. Ils documents da consultaziun pon vegnir chargiads giu da la pagina d'internet dal departament da finanzas e vischnancas (www.dfg.gr.ch).


Agiunta:
Documents da consultaziun


Infurmaziuns:
- president da la regenza dr. Martin Schmid, schef dal departament da finanzas e vischnancas, tel. 081 257 32 01
- dr. Toni Hess, manader dal servetsch giuridic da l'administraziun chantunala da taglia, tel. 081 257 33 26


Gremi: regenza
Funtauna: rg chanzlia chantunala dal Grischun