La regenza grischuna suttametta al cussegl grond ina missiva davart la participaziun dal chantun a la finanziaziun da la scola auta interstatala per tecnica (NTB) a Buchs. A medem temp propona ella d'iniziar ils pass necessaris per ch'il chantun possia sa retrair sco purtader da la NTB, ma restar er vinavant commember da la scola auta spezialisada da la Svizra orientala. Il cussegl grond vegn a tractar la fatschenta en la sessiun da december.
Ils chantuns Son Gagl e Grischun sco er il principadi da Liechtenstein mainan la NTB sco institut autonom da dretg public cun atgna persunalitad giuridica. La NTB è focussada sin il sectur spezial "tecnica" cun accent sin tecnologias novas ed è ina da las quatter scolas parzialas da la scola auta spezialisada da la Svizra orientala. Tranter la NTB e la scola auta da tecnica ed economia (SATE) a Cuira exista in contract da cooperaziun per il studi d'inschigner da sistems.
Ils indrizs ed ils apparats da labor che vegnan duvrads oz da la NTB en il sectur da la perscrutaziun e dal svilup orientà a l'applicaziun, han per part fin a 25 onns e ston vegnir remplazzads urgentamain. Igl è previs d'investir totalmain 17,7 milliuns francs en indrizs ed en apparats da labor sco er en in engrondiment da l'edifizi da labor existent. Per l'entir project ha la confederaziun empermess subvenziuns da 3,7 milliuns francs. La NTB sezza sa participescha cun 1 milliun francs vi da las investiziuns. Ils custs nets da 13 milliuns francs vegnan repartids sin ils purtaders da la NTB, e quai sin basa da la media dal dumber da studentas e da students ch'èn stads immatriculads ils onns 2000 fin 2009 a la NTB. Per ils purtaders resultan uschia las suandantas contribuziuns d'investiziun:
- chantun Son Gagl 9'444'500 francs
- chantun Grischun 2'598'700 francs
- principadi da Liechtenstein 956'800 francs
La contribuziun duai segirar l'avegnir dals trais champs da cumpetenza ils pli impurtants da la NTB, numnadamain ils "sistems d'energia", la "microtecnologia e nanotecnologia" sco er la "tecnica da mesiraziun da la producziun". In engrondiment da l'edifizi da labor existent è necessari, perquai che mo ina pitschna part dals indrizs e dals apparats da labor planisads po – pervia da las pretensiuns tecnicas e da spazi – vegnir plazzada en las localitads existentas da la NTB.
Permetter il credit e preparar l'extrada
La regenza grischuna propona al cussegl grond d'approvar la participaziun finanziala dal chantun en l'autezza da circa 2,6 milliuns per las investiziuns da renovaziun da la NTB e da conceder il credit d'impegn necessari. Quest credit è suttamess al referendum facultativ. A medem temp propona ella – en il rom d'ina missiva al cussegl grond – da pudair far las preparaziuns necessarias per ch'il chantun Grischun possia sa retrair sco purtader da la NTB, ma restar er vinavant commember da la scola auta spezialisada da la Svizra orientala.
Quai fa la regenza sin basa da las suandantas ponderaziuns: Il Grischun vegn a stuair far ils proxims onns investiziuns pli grondas en il chantun. Ins po partir dal fatg ch'i resultian ils proxims onns medemamain lavurs da sanaziun per l'entir stabiliment da scola da la NTB. Per concentrar ils meds finanzials disponibels en il sectur da las scolas autas na po il chantun Grischun betg mantegnair anc autras obligaziuns finanzialas extrachantunalas. Er en vista ad in'organisaziun futura pli transparenta e pli clera da la scola auta spezialisada da la Svizra orientala vul la regenza sa retrair da la cunvegna davart la NTB, ma restar er vinavant commember da la scola auta spezialisada da la Svizra orientala. Cun ina restructuraziun da la scola auta spezialisada da la Svizra orientala fiss il chantun Grischun responsabel en l'avegnir en emprima lingia per la SATE a Cuira, entant ch'il chantun Son Gagl ed eventuals auters chantuns sco er il principadi da Liechtenstein fissan purtaders da las ulteriuras trais scolas parzialas a Son Gagl, a Buchs ed a Rapperswil.
Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01
Gremi: regenza
Funtauna: rg chanzlia chantunala dal Grischun