En il chantun Grischun duai la planisaziun dals ospitals vegnir fixada da nov sin il stgalim da la lescha tenor ils princips da la qualitad e da la rentabilitad. La regenza grischuna ha deliberà la consultaziun correspundenta tar la revisiun parziala da la lescha per promover la tgira da persunas malsaunas. A chaschun da sia ultima sesida ha ella plinavant tractà differentas fatschentas da vischnancas e da regiuns.

Nova basa per ina planisaziun dals ospitals orientada a las prestaziuns
Tras ina revisiun parziala da la lescha per promover la tgira da persunas malsaunas duain ils criteris, ch'èn decisivs per elavurar la planisaziun dals ospitals tenor la revisiun da la lescha federala davart l'assicuranza da malsauns, ma er las pretensiuns ch'ils ospitals ston ademplir per vegnir inscrits sin la glista dals ospitals, vegnir francads en il chantun Grischun sin il stgalim da la lescha. Ina impurtanza speziala survegnan – tenor las prescripziuns da la confederaziun – ils criteris "qualitad" e "rentabilitad". La regenza grischuna ha avert la consultaziun tar la revisiun parziala da la lescha.

La planisaziun dals ospitals actuala dal chantun Grischun datescha da l'onn 2002 ed è vegnida deliberada quella giada da la regenza. La glista dals ospitals dal chantun, che sa basa sin questa planisaziun e ch'è medemamain vegnida relaschada da la regenza, è vegnida adattada differentas giadas dapi lura. La glista cuntegna las incaricas da prestaziun per ils ospitals e per las clinicas sco er ils dumbers da letgs per pazientas e per pazients che als vegnan attribuids. Questa planisaziun dals ospitals, che sa referescha a las capacitads, ed er questa glista dals ospitals ston vegnir remplazzadas fin il pli tard il 1. da schaner 2015 pervia dal nov dretg federal. La revisiun da la lescha federala davart l'assicuranza da malsauns pretenda che las planisaziuns chantunalas dals ospitals vegnian fatgas s'orientond a las prestaziuns e vul ch'ellas sa basian sin cumparegliaziuns da manaschis che resguardan la qualitad e la rentabilitad.

Ils criteris per elavurar la nova planisaziun dals ospitals respectivamain per repassar la planisaziun dals ospitals vertenta e las pretensiuns ch'ils ospitals e las clinicas ston ademplir per vegnir inscrits sin la glista dals ospitals, duain vegnir fixads da nov sin il stgalim da la lescha. La finamira è er vinavant quella che la populaziun disponia d'in provediment medicinal d'auta qualitad. La glista dals ospitals duai plinavant procurar ch'i dettia tranter ils furniturs da prestaziuns ina concurrenza reglada sut las medemas premissas. Per promover la concurrenza prevesa il sboz da consultaziun che la regenza po er surdar incaricas da prestaziun che surpassan il basegn. La regenza prevesa da profitar da questa pussaivladad en spezial tar ospitals pli pitschens en il chantun, sch'els giavischan quai. Els ston dentant cumprovar d'ademplir las premissas infrastructuralas e persunalas che vegnan pretendidas areguard la qualitad per las purschidas ch'els giavischan (link tar ils documents da consultaziun).

Beneventà dapli autonomia per MeteoSvizra
La regenza grischuna beneventa l'intenziun da la confederaziun da dar a l'uffizi federal per meteorologia e climatologia (MeteoSvizra) la furma giuridica d'in institut da dretg public, uschia che MeteoSvizra survegn dapli autonomia. Ella sustegna la revisiun correspundenta da la lescha federala davart la meteorologia e climatologia. A medem temp renda la regenza attent en sia resposta da consultaziun che en spezial l'uffizi chantunal da guaud e privels da la natira saja dependent er en l'avegnir dals servetschs da MeteoSvizra.


Da vischnancas e da regiuns

• Vaz: Per renovar la rait da vias champestras en il rom da la meglieraziun generala da la vischnanca da Vaz vegn concedida ina contribuziun chantunala maximala da 1'324'341 francs. Quai cun resalva d'ina contribuziun federala. La vischnanca da Vaz vegn obligada da pajar 20 pertschient vi da la contribuziun chantunala. 
• Fanas: Per l'etappa preparatorica da la meglieraziun generala da la vischnanca da Fanas vegn garantida ina contribuziun maximala da 75'670 francs. 
• Sumvitg: La revisiun parziala da la planisaziun locala da la vischnanca da Sumvitg dals 14 da zercladur 2011 vegn approvada. 
• Scuol: La revisiun parziala da la lescha da construcziun, concludida da la vischnanca da Scuol ils 12 da december 2010, vegn approvada. 
• Breil: Il plan d'areal cun regruppament dal terren 1:1'000 "Davos Tuor/Carlogns" da la vischnanca da Breil dals 25 da fanadur 2011 vegn approvà. 
• Bravuogn: La revisiun parziala da la planisaziun locala, concludida da la vischnanca da Bravuogn ils 23 da mars 2011, vegn approvada. 
• Bravuogn: Il project "Protecziun cunter lavinas Cuolm da Latsch" da la vischnanca da Bravuogn vegn approvà. Als custs da 560'000 francs vegn garantida ina contribuziun maximala da 448'000 francs. 
• Vrin: Il project "Rempar cunter squatschs da naiv Plaunca Biet" sin il territori da la vischnanca da Vrin vegn approvà. Quest project era vegnì inoltrà per incumbensa da l'uffizi da construcziun bassa dal Grischun. Ils custs da construcziun importan 65'000 francs. 
• Küblis: Il project d'exposiziun per curreger e per schlargiar la via da Tälfsch, traject dal conduct da pressiun Pläviggin fin Tälfsch (kilometer 0,520 fin 1,065) sin il territori da la vischnanca da Küblis, vegn approvà. 
• Maladers: Il reglament per las zonas da protecziun ed il plan da las zonas da protecziun a la scala 1:5'000 per las funtaunas dal provediment d'aua communal da la vischnanca da Maladers dals 11 d'avrigl 2011 vegnan approvads. 
• Rueun: Il reglament per las zonas da protecziun ed il plan da las zonas da protecziun a la scala 1:2'000 per las funtaunas da la vischnanca da Rueun, relaschads ils 27 fanadur 2009 respectivamain ils 26 d'avrigl 2011 da las suprastanzas communalas da Rueun e da Siat, vegnan approvads.

Contribuziuns chantunalas a differentas instituziuns

• Uniun per il cup mundial da Lai: A l'uniun per il cup mundial da Lai vegnan garantidas contribuziuns da mintgamai 150'000 francs per organisar ils onns 2013 e 2014 il final da la cuppa mundiala da skis da la FIS a Lai. Quai sut la resalva ch'il cussegl grond concedia mintgamai ils credits. 
• Uniun chantunala da musica dal Grischun: Per realisar las duas emnas da scolaziun da l'orchester da flad da giuventetgna dal Grischun e da la brass band da giuventetgna dal Grischun vegn garantida a l'uniun chantunala da musica dal Grischun ina garanzia da deficit da maximalmain 50'000 francs per onn.

Gremi: regenza
Funtauna: rg chanzlia chantunala dal Grischun