La regenza grischuna ha approvà il project d'exposiziun per il sviament da Schmitten. Tras quel vegn meglierada considerablamain la qualitad da viver en il center dal vitg da Schmitten. Ultra da quai ha la regenza revedì – a chaschun da sia ultima sesida – las prescripziuns da pestga ed engaschà in cumissari da la regenza per la vischnanca da Mesauc.

Il sviament da Schmitten po vegnir realisà
La regenza grischuna ha approvà il project d'exposiziun per il sviament al sid da Schmitten. Suenter avair fatg ina consideraziun cumplessiva dals interess attribuescha ella dapli impurtanza a l'augment da la qualitad d'abitar e da la valur dal maletg dal center dal vitg da Schmitten che a las influenzas negativas dal project dal sviament.

Gia dapi blers onns resenta la populaziun da Schmittan la grevezza tras il traffic da transit sco insupportabla. En las vias stretgas e malsurvesaivlas da Schmitten sa furman regularmain colonnas, ed il traffic pesant chaschuna schizunt donns vi d'edifizis. Sin l'entir traject entaifer il vitg manca ultra da quai in passape. Las pedunas ed ils peduns sco er las abitantas ed ils abitants èn exponids senza protecziun al traffic sin via. Gia pli baud han ins discussiunà davart differentas variantas da sviar il traffic al nord dal vitg e da far adattaziuns entaifer il vitg. Quellas n'èn dentant betg vegnidas acceptadas. Silsuenter han ins elavurà in project per in sviament d'ina lunghezza da 2'270 meters al sid dal vitg. Il sviament banduna la via da la Landwasser en il sectur da Valtära, traversa la foppa champestra Annawisa sin l'autezza dal terren fin a l'aual da Schmitten e maina il traffic enturn l'abitadi dad Osterhubel. Alura maina la via per lung dal con da Guot. La finala ascenda ella sut Parfurgga puspè siador en la via da la Landwasser.

La fin da l'onn 2010 è il project dal sviament inclusiv il rapport davart la cumpatibilitad ecologica, l'adattaziun dal plan directiv chantunal e la runcada vegnì exponì publicamain en la vischnanca da Schmitten. En las posiziuns ed en las protestas hai dà reacziuns cuntradictoricas. En ina petiziun beneventan var 65 pertschient da las abitantas e dals abitants cun dretg da votar il sviament al sid da Schmitten. Ils arguments cunter il sviament èn la fragmentaziun da la cuntrada da terrassas e dal spazi da recreaziun, l'influenza negativa sin il maletg dal vitg e da la cuntrada ed il disturbi da l'agricultura sco er dals spazis da viver da differentas spezias d'animals. En il rapport davart la cumpatibilitad ecologica vegnan descrittas bleras mesiras da cumpensaziun a favur da la natira e da la cuntrada. En in rapport da giudicament pretenda il post spezialisà chantunal per la protecziun da l'ambient mesiras da cumpensaziun supplementaras che van anc in pass pli lunsch en cas ch'il project dal sviament vegn realisà.

Pervia da las posiziuns e da las protestas cuntradictoricas ha la regenza fatg ina consideraziun dals interess cumplessiva sco basa per sia decisiun d'approvaziun. Ella è conscienta che la realisaziun dal project chaschuna ina intervenziun en ils spazis da viver ed en la cuntrada. Perquai ston vegnir exequidas stringentamain tut las mesiras da cumpensaziun. Tut en tut attribuescha la regenza dentant dapli impurtanza a l'augment da la qualitad d'abitar e da la valur dal maletg dal center dal vitg da Schmitten che a las influenzas negativas dal project dal sviament.

Ensemen cun l'approvaziun dal project da vias dat la regenza er il consentiment per runcar il guaud e per adattar il plan directiv chantunal. Ils custs totals vegnan calculads cun var 17 milliuns francs, inclusiv las expensas per las mesiras da cumpensaziun. I vegn fatg quint cun in temp da construcziun da 2 fin 3 onns.

La pestga en ils lais vegn prolungada
La stagiun da pestga en ils lais vegn prolungada per 1 mais. La regenza grischuna ha adattà las prescripziuns da pestga ed acceptà uschia in giavisch dals circuls turistics. La stagiun principala da pestga cumenza il 1. da matg e dura en auas stagnantas da nov fin e cun ils 15 d'october (fin ussa fin ils 15 da settember). La prolungaziun da la stagiun da pestga na vala dentant betg en lais, nua ch'i sa chattan l'atun las plazzas da fregar impurtantas per il sistem d'auas. En auas currentas dura la stagiun da pestga vinavant fin e cun ils 15 da settember. Mantegnì vegn er il traject dal Rain alpin, nua ch'i dastga vegnir pestgà tenor il dretg vertent a partir dal 1. da favrer. Il medem vala per la zona da protecziun per las litschalas en Engiadin'ota. Per proteger las litschalas cumenza la stagiun da pestga là pir il 1. da zercladur. Da nov vegn scumandada la pestga da litschalas en l'intschess da la Moesa.

Ulteriuras novas prescripziuns èn vegnidas relaschadas areguard las mesiras dals peschs che vegnan pigliads ed areguard la pestga d'exercizi. Il scumond da pestgar il di da la rogaziun federala è vegnì abolì. Las disposiziuns per tractar ils peschs en moda adequata èn vegnidas precisadas parzialmain. Pitschnas adattaziuns hai dà en connex cun la determinaziun da las zonas da protecziun. Parzialmain cumplettada ed adattada è la finala vegnida la glista da las multas disciplinaras.
Las prescripziuns da pestga revedidas vegnan inoltradas a la confederaziun per l'approvaziun.

Nominà in cumissari da la regenza per Mesauc
La regenza grischuna ha decidì d'engaschar in cumissari da la regenza per la vischnanca da Mesauc. Questa mesira ha la regenza prendì, perquai che la suprastanza communala da Mesauc n'è betg pli abla da decider dapi ils 12 da settember 2011. Dapi questa data n'han dus commembers da la suprastanza betg pli prendì part a las sesidas. La constituziun communala fixescha dentant che l'abilitad da decider è mo dada, sche tut ils commembers da la suprastanza en uffizi èn preschents. La decisiun da la regenza sa basa sin ina proposta da la cumissiun da gestiun communala d'engaschar in cumissari da la regenza. A chaschun d'ina discussiun ils 17 d'october 2011 è l'entira suprastanza communala s'exprimida a favur da questa mesira. La cumissiun da gestiun da la vischnanca sco er represchentantas e represchentants da l'uffizi da vischnancas èn stads preschents a questa discussiun. L'engaschament d'in cumissari da la regenza senza cumpetenza da decisiun è la mesira la pli moderada en questa chaussa per restituir l'abilitad d'agir da la suprastanza communala. Sco cumissari da la regenza vegn mess en uffizi l'advocat e deputà Mirco Rosa da Lostallo. La mesira è limitada temporarmain fin la fin da l'onn 2011.

La regenza regla las indemnisaziuns per la tgira
La regenza ha fixà las tariffas per la tgira acuta e transitorica en chasas da persunas attempadas e da tgira sco er en gruppas da tgira en il chantun Grischun. Las tariffas sa drizzan tenor custs da 0.95 francs per minuta da tgira e tenor la durada dal basegn da tgira per di (il stgalim minimal 1 correspunda al basegn da tgira da fin a 20 minutas per di, il stgalim maximal 12 al basegn da tgira da passa 220 minutas). Da l'assicuranza obligatorica per la tgira da persunas malsaunas resultan pia custs da 4.30 francs (stgalim 1) fin a 98.30 francs per di da tgira (stgalim 12) per las assicuranzas da malsauns. Quai correspunda ad ina part dals custs da 45 pertschient. La part dal maun public importa 55 pertschient.
La regenza grischuna ha stuì fixar las tariffas, perquai che la federaziun grischuna "chasas ed ospitals" e las assicuranzas da malsauns ch'èn affiliadas a tarifsuisse n'èn betg vegnidas da sa cunvegnir en las tractativas davart las tariffas per il 1. da schaner 2011.


Da vischnancas e da regiuns

• Avras: La revisiun parziala da la lescha da construcziun, concludida da la vischnanca dad Avras il 1. da fanadur 2011, vegn approvada. 
• Regiun Valposchiavo: L'ordinaziun davart l'elavuraziun da la planisaziun directiva regiunala da la Val Puschlav ch'è vegnida concludida da questa regiun ils 23 da mars 2011, vegn approvada. 
• Ruschein: Cun resalva che la confederaziun paja sia contribuziun garantida, vegn concedida a la vischnanca da Ruschein ina contribuziun chantunala da maximalmain 212'970 francs per renovar las vias champestras principalas.

Projects da vias
La regenza ha approvà totalmain 5'900'000 francs per construir e per sanar il suandant traject da via:
- via sursilvana: lavurs d'impressari, Trin Mulin – Felsbach


Gremi: regenza
Funtauna: rg chanzlia chantunala dal Grischun