Per introducir ina glista naira da debituras e da debiturs da premias sco er ina nova regulaziun dal pajament da la reducziun da las premias dovri dapli temp. La revisiun parziala da la lescha davart l'assicuranza da malsauns e la reducziun da las premias vegn perquai messa en vigur pass per pass.

La glista da debituras e da debiturs da premias è en elavuraziun
Da la revisiun parziala da la lescha davart l'assicuranza da malsauns e la reducziun da las premias, ch'il cussegl grond ha deliberà ils 15 da zercladur 2011, vegnan mo parts messas en vigur per il 1. da schaner 2012. Quai ha concludì la regenza grischuna. Las disposiziuns legalas davart persunas che pajan lur premias cun retard (artitgels 2a ed 11a) sco er davart la nova regulaziun dal pajament da la reducziun da las premias (aboliziun da l'artitgel 11 vertent) pon vegnir introducidas pir pli tard.

Tenor il dretg nov maina l'institut d'assicuranza sociala dal chantun Grischun (IAS) ina glista da las persunas assicuradas che n'adempleschan – malgrà ina scussiun – betg lur obligaziun da pajar las premias da la cassa da malsauns (artitgel 11a). Sche las assicuranzas annunzian a la IAS debituras e debiturs che vegnan stumads (artitgel 2a), ston questas persunas vegnir inscrittas en la glista. Quai cun la consequenza ch'il tractament medicinal è restrenschì fermamain per questas persunas. La concepziun da la glista è vaira cumplexa. Uschia ston l'actualitad da las datas e la protecziun da las pazientas e dals pazients esser garantidas. Igl è previs che l'access segirà a la glista vegnia realisà sin via electronica sur la pagina d'internet dal IAS. Per motivs tecnics n'è ina tala soluziun dentant betg realisabla per il 1. da schaner 2012. Cunquai che plirs chantuns vegnan previsiblamain a manar ina glista naira da persunas che pajan lur premias cun retard, vegni tranter auter er lavurà vi d'ina soluziun communabla. Questa soluziun vegn a star a disposiziun il pli baud per l'onn 2013.

Il fatg che la reducziun da las premias vegn pajada da nov a las assicuranzas e betg a las persunas assicuradas (aboliziun da l'artitgel 11) po – per motivs tecnics – medemamain vegnir mess en vigur pir cun retard. Quai ha la regenza gia menziunà en sia missiva al cussegl grond. Sin basa dal dretg federal ston questas chaussas dentant entrar en vigur il pli tard dus onns suenter las autras parts da la revisiun da la lescha.

Percunter ha la regenza concludì ina revisiun totala da l'ordinaziun correspundenta che resulta en consequenza da la revisiun da la lescha.

In dretg unitar da surannaziun vegn beneventà da princip
La regenza grischuna beneventa l'unificaziun dal dretg da surannaziun sco er la prolungaziun dals termins da surannaziun che la confederaziun prenda en mira tras ina revisiun parziala dal dretg d'obligaziuns. En sia resposta da consultaziun renda ella dentant attent ch'in termin da surannaziun unitar absolut per donns da persunas, per donns materials e per donns mo da facultad na sa laschass betg giustifitgar, damai ch'ils bains giuridics respectivamain l'intervenziun en tals vegnan valitads differentamain.


Da vischnancas e da regiuns

• Falera: La revisiun parziala da la planisaziun locala, concludida da la vischnanca da Falera ils 3 da zercladur 2011, vegn approvada. La revisiun cumpiglia d'ina vart ina planisaziun d'utilisaziun per il project d'in nov hotel en il territori da Fandrels sut la Muotta. Da l'autra vart ha la vischnanca relaschà ina nova lescha davart abitaziuns secundaras. Cun quella vul ella ademplir l'incarica dal plan directiv chantunal da prender mesiras per diriger la construcziun d'abitaziuns secundaras. Tenor il plan directiv duain las vischnancas turisticas dal Grischun disponer fin la mesadad da l'onn 2013 da soluziuns adequatas per diriger specificamain il svilup tar las abitaziuns secundaras.

Contribuziuns chantunalas a differentas instituziuns

• Associaziun grischuna da sport: A 46 organisaziuns e federaziuns da sport che fan part da l'associaziun grischuna da sport vegnan pajadas l'onn 2011 contribuziuns pauschalas da totalmain 1'000'000 francs or dal fond da sport.

Projects da vias
La regenza ha approvà 2'200'000 francs per lavurs da construcziun sin il suandant traject:
- via naziunala A28: project d'execuziun per l'equipament da manaschi e da segirezza dal sviament da Küblis


Gremi: regenza
Funtauna: rg chanzlia chantunala dal Grischun