Scolaras e scolars duain pudair vegnir instruids en rumantsch grischun fin a la fin dal temp da scola obligatoric. En lur interess s'exprima la regenza grischuna da princip cunter ina midada da la lingua da scola suenter il cumenzament da l'emprima classa primara.

Scolaras e scolars che han actualmain rumantsch grischun sco lingua da scola duain vegnir instruids en questa varianta linguistica fin a la fin da lur temp da scola obligatoric. Tenor l'avis da la regenza sto ina midada da la lingua da scola da rumantsch grischun ad in idiom u viceversa vegnir fatga da princip il cumenzament da la 1. classa primara. Excepziunalmain po ina tala midada da la lingua da scola er vegnir fatga per scolaras e scolars che frequentan actualmain la 1. classa primara fin il pli tard il cumenzament da l'onn da scola 2012/2013, premess che quai vegnia decidì uschia da l'instituziun ch'è responsabla per la scola. Cun questa constataziun regla la regenza la situaziun da quellas vischnancas che avevan introducì il rumantsch grischun sco vischnancas da piunier e tar las qualas in return a l'idiom stat en discussiun u è gia fixà, perquai che iniziativas u petiziuns correspundentas èn vegnidas inoltradas.

Il princip d'avair ina lingua da scola per tut la durada da la scola populara ha la regenza sustegnì per plirs motivs. Tant aspects pedagogics sco er giuridics pledan cunter ina midada da la lingua da scola vertenta avant la terminaziun dal temp da scola obligatoric. Uschia han ils uffants pertutgads in interess giustifitgà da vegnir instruids en ina varianta linguistica respectivamain en la lingua da scrittira durant lur entir temp en la scola populara. Per motivs da la segirezza giuridica e da l'egualitad da las schanzas sco er resguardond il princip dal tractament egual ston ellas ed els vegnir protegids en lur confidenza che l'instrucziun vegnia cuntinuada en quella lingua da scola, en la quala ella è vegnida cumenzada, e quai fin a la fin dal temp da scola obligatoric. Las scolaras ed ils scolars ch'èn vegnids alfabetisads en rumantsch grischun a partir da la 1. classa primara han – ditg cun auters pleds – il dretg che l'instrucziun vegnia cuntinuada en questa varianta linguistica. Quai er en vista als examens d'admissiun a la scola media cun examens linguistics en rumantsch grischun u en l'idiom correspundent.


Gremi: regenza
Funtauna: rg chanzlia chantunala dal Grischun