La regenza suttametta al cussegl grond l'emprima missiva per la realisaziun da la refurma da vischnancas. Il punct central dal project è la renunzia a la fusiun automatica da las vischnancas burgaisas, sche las vischnancas politicas fusiuneschan. Uschia vegn eliminà in eventual impediment per fusiuns da vischnancas, perquai che las vischnancas burgaisas n'èn betg pli pertutgadas directamain d'ina fusiun da las vischnancas politicas.

En sia sessiun da favrer 2011 è il cussegl grond sa fatschentà intensivamain cun la refurma da vischnancas e dal territori. En quest connex è il parlament s'exprimì per ina simplificaziun fundamentala da las structuras statalas che duai vegnir realisada d'ina vart cun agid d'ina refurma da vischnancas e da l'autra vart cun ina refurma dal territori. Sco emprim project da realisaziun en il rom da la refurma da vischnancas suttametta la regenza al cussegl grond ina missiva per ina revisiun parziala da la constituziun chantunala e da la lescha da vischnancas (refurma da vischnancas: project parzial davart las vischnancas burgaisas).

Tenor l'art. 89 da la lescha da vischnancas actuala vala la fusiun da las vischnancas politicas er automaticamain per las vischnancas burgaisas correspundentas. Tenor la voluntad dal cussegl grond duai vegnir abolì quest automatissem che ha effects dischavantagius en la pratica per fusiuns da vischnancas.

Nagina fusiun automatica da las vischnancas burgaisas
Sch'il project entrass en vigur, na chaschunass la fusiun da las vischnancas politicas betg pli ina fusiun automatica da las vischnancas burgaisas. Per realisar questas decisiuns fundamentalas dal cussegl grond ston vegnir adattadas la constituziun chantunala (art. 61) e plirs artitgels da la lescha da vischnancas.

En l'avegnir duain las vischnancas burgaisas pudair fusiunar sco fin ussa en il rom da fusiuns da vischnancas politicas, ellas na ston dentant betg far quai stringentamain. Quai ha per consequenza che las vischnancas burgaisas vertentas pon exister er vinavant, malgrà la fusiun da vischnancas politicas. Suenter ina fusiun po il territori d'ina vischnanca politica perquai cumpigliar en l'avegnir pliras vischnancas burgaisas. Quellas disponan vinavant da la facultad burgaisa respectiva ed èn cumpetentas per conceder il dretg da burgais. Il lieu da burgais sa drizza tenor il num da la nova vischnanca politica.

Perquai che las vischnancas burgaisas pon exister vinavant en il futur – independentamain d'ina fusiun da las vischnancas politicas – vegn stritgada la pussaivladad da pudair externalisar la facultad burgaisa or da la vischnanca burgaisa. La regenza vul uschia evitar che la finamira da simplifitgar las structuras vegnia impedida cun stgaffir ulteriurs subjects giuridics per l'administraziun da la facultad burgaisa. Da quai poi mo vegnir divergià, sche las vischnancas burgaisas existentas fusiuneschan cun las vischnancas politicas e sa schlian a medem temp. In tal subject giuridic externalisà vegn surveglià da la vischnanca politica, e quella sto guardar ch'il bain public restia en ils mauns da la publicitad.

La discussiun dal project en il cussegl grond è previsa per la sessiun da favrer 2012. Suenter ch'il cussegl grond ha approvà il project vegn la revisiun parziala da la constituziun chantunala suttamessa al pievel grischun per la votaziun.


Infurmaziuns:
- cussegliera guvernativa Barbara Janom Steiner, scheffa interimistica dal departament da finanzas e vischnancas, tel. 081 257 25 01
- Thomas Kollegger, manader da l'uffizi da vischnancas, tel. 081 257 23 81


Gremi: regenza
Funtauna: rg chanzlia chantunala dal Grischun