Ils 11 da mars 2012 na vegni betg mo votà davart tschintg projects federals mabain er davart duas fatschentas chantunalas. Quai ha concludì la regenza. Plinavant ha ella adattà l'ordinaziun davart la protecziun da l'ambient e deliberà in program d'aglomeraziun per Tavau.

Dus projects da votaziun per ils 11 da mars 2012
Dumengia, ils 11 da mars 2012, vegni votà davart duas fatschentas chantunalas, numnadamain davart la revisiun parziala da la constituziun chantunala (realisaziun dal nov dretg da protecziun da l'uffant e da creschids) sco er davart il credit d'impegn da 69 milliuns francs per construir in nov center administrativ chantunal.
Sin plaun federal vegnan suttamess a la votaziun dal pievel dals 11 da mars 2012 ils suandants projects: l'iniziativa dal pievel "Per metter ina fin a la construcziun excessiva d'abitaziuns secundaras!", l'iniziativa dal pievel "Per in tractament fiscal privilegià da respargns immobigliars destinads a la cumpra da proprietad d'abitar per l'agen diever ed a la finanziaziun da mesiras da construcziun per spargnar energia e per proteger l'ambient (iniziativa per il respargn immobigliar)", l'iniziativa dal pievel "6 emnas vacanzas per tuts", il conclus federal davart la reglamentaziun dals gieus per daners a favur da l'utilitad publica (cuntraproposta a l'iniziativa dal pievel "Per gieus per daners a favur dal bainstar public") sco er la lescha federala davart ils pretschs fixs per cudeschs.

Elecziuns da las dretgiras districtualas ils 17 da zercladur 2012
L'elecziun da las dretgiras districtualas per la perioda d'uffizi dal 1. da schaner 2013 fin ils 31 da december 2016 ha lieu ils 17 da zercladur 2012. Eventuals segunds scrutinis vegnan fatgs ils 8 da fanadur 2012. Per realisar las elecziuns èn responsablas las dretgiras districtualas en cooperaziun cun las vischnancas.

La chareschia negativa na vegn betg gulivada
Ils salaris fundamentals da las collavuraturas e dals collavuraturs da l'administraziun chantunala e da las persunas d'instrucziun da las scolas popularas restan ils medems l'onn 2012. La regenza grischuna ha concludì che la chareschia negativa (minus 0,6 puncts) na vegnia betg gulivada per il 1. da schaner 2012. La basa da la decisiun da conceder ina cumpensaziun da chareschia è mintgamai il stadi da l'index naziunal dals pretschs da consum la fin da november (2011: 103,6 puncts, 2010: 104,2 puncts).

Naginas contribuziuns per transports da rument sur il cunfin chantunal ora
Corporaziuns per la gestiun da ruments survegnan contribuziuns chantunalas per transports a lunga distanza da ruments chasans mo pli, sche quels vegnan fatgs entaifer il chantun. Quai ha concludì la regenza cun ina revisiun parziala da l'ordinaziun chantunala davart la protecziun da l'ambient. Tenor l'avis da la regenza na poi ozendi betg pli vegnir giustifitgà da pajar contribuziuns a transports a lunga distanza sur il cunfin chantunal ora, schebain che la dismessa dals ruments è senz'auter pussaivla en il Grischun, e ruments chasans combustibels da tut il chantun ston – tenor la lescha chantunala davart la protecziun da l'ambient – da princip vegnir surdads al stabiliment per arder ruments a Trimmis. En quest connex prevesa la lescha però tschertas excepziuns. La nova ordinaziun è ina soluziun transitorica: In'aboliziun u ina midada d'intent da la cumpensaziun dals custs da transport duai vegnir fatga sin il stgalim d'ina lescha, sche la nova concepziun da la gulivaziun da finanzas e da la repartiziun da las incumbensas tranter il chantun e las vischnancas vegn puspè tractada.


Da vischnancas e da regiuns

• Tavau: La regenza grischuna ha concludì e deliberà per mauns da la confederaziun in program d'aglomeraziun per Tavau. En il rom da programs d'aglomeraziun sa participescha la confederaziun a la finanziaziun da mesiras per meglierar l'infrastructura da traffic en citads ed en aglomeraziuns. Il program coordinescha il svilup d'abitadi ed il traffic resguardond l'ambient. Ils elements ils pli impurtants dal program d'aglomeraziun vegnan mussads en il plan directiv chantunal. La responsabladad principala per realisar il program d'aglomeraziun è en ils mauns da la vischnanca da Tavau. Ils custs importan totalmain circa 90 milliuns francs. Il chantun sa participescha cun ina contribuziun tranter 16,82 e 23,368 milliuns francs. 
• Flem: A la vischnanca da Flem vegn garantida ina contribuziun maximala da 789'895 francs per engrondir e per renovar la serenera. 
• Masagn: La revisiun parziala da la constituziun communala, concludida da la vischnanca da Masagn ils 21 da november 2011, vegn approvada. 
• Moesa: La revisiun parziala dals statuts dal consorzi da scola "Corporazione di comuni moesani per la scuola secondaria di valle e la scuola di avviamento pratico" vegn approvada. 
• Tusaun: Il cussegl communal da Tusaun ha concludì ils 5 da settember 2011 da surdar las incumbensas da la polizia communala a la polizia chantunala dal Grischun, e quai per il 1. da schaner 2013. La regenza ha approvà in contract correspundent tranter il chantun Grischun e la vischnanca. 
• Haldenstein: La revisiun totala da la planisaziun locala, concludida ils 29 d'avrigl 2011 da la vischnanca da Haldenstein, vegn approvada. 
• Scuol: La revisiun parziala da la planisaziun locala da la vischnanca da Scuol dals 12 da december 2010 vegn approvada.

Gremi: regenza
Funtauna: rg chanzlia chantunala dal Grischun