La regenza grischuna ha nominà Richard Atzmüller sco nov manader da l'uffizi per il svilup dal territori. El vegn a manar l'uffizi a partir da mez da l'onn 2012.

Richard Atzmüller lavura dapi l'onn 1995 tar l'uffizi per il svilup dal territori dal Grischun, dapi l'onn 1997 sco manader da la partiziun "planisaziun directiva e basas". Dapi l'onn 2007 è el il substitut dal manader da l'uffizi. La regenza grischuna ha tschernì il geograf da 47 onns sco nov manader dal post da servetsch. Richard Atzmüller suonda Cla Semadeni che va en pensiun ils 31 da fanadur 2012, suenter ch'el è stà 14 onns en questa funcziun.

L'uffizi per il svilup dal territori realisescha – en collavuraziun cun la confederaziun, cun las regiuns e cun las vischnancas – las finamiras ed ils princips da la planisaziun dal territori tenor las prescripziuns legalas. Il manader da l'uffizi è suttamess directamain al schef dal departament d'economia publica e fatgs socials e maina in team da circa 25 collavuraturas e collavuraturs.


Fotografia agiuntada:
Richard Atzmüller, nov manader da l'uffizi per il svilup dal territori


Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01


Gremi: regenza
Funtauna: rg chanzlia chantunala dal Grischun